काठमाडौं । वैदेशिक रोजगार बोर्डलाई थप प्रभावकारी बनाउन अब तीनवटा समिति गठन गरिने भएको छ । वैदेशिक रोजगार बोर्डअन्तर्गतका समिति (गठन तथा सञ्चालन) मापदण्ड, २०८१ मा यस्तो व्यवस्था गरिएको छ । मापदण्ड गत मंसिर २५ गते स्वीकृत गरिएको हो ।

“यस मापदण्डबमोजिम बोर्डलाई सहयोग र रहजीकरण गर्न बोर्डअन्तर्गत रही कार्य सम्पादन गर्ने गरी देहाय बमोजिमको विषयगत समिति रहने छन्,” मापदण्डमा भनिएको छ, “नीति, कानुन एवं व्यवस्थापकीय समिति, तालिम तथा अध्ययन अनुसन्धान समिति र कल्याणकारी कार्य व्यवस्थापन समिति ।”

समितिमा बोर्ड सदस्यमध्येबाट विषय विज्ञताको आधारमा बोर्डले तोकेको एकजना संयोजकसहित बढीमा सातजना सदस्य रहने छन् ।

समितिको सचिवको रूपमा बोर्ड सचिवालयको सम्बन्धित शाखाको प्रमुख वा कार्यकारी निर्देशकले तोकेको अधिकृत रहनेछन् ।

“ऐन, नियमावली एवं निर्देशिकाद्वारा बोर्डलाई प्रदत काम, कर्तव्य र अधिकारमध्ये आफ्नो समितिलाई यस मापदण्डबमोजिम तोकेको कार्यक्षेत्रको विषयमा समितिमा छलफल गरी निर्णयका लागि अध्यक्षमार्फत बोर्डमा पेस गर्ने,” समितिको काम, कर्तव्य र अधिकारमा उल्लेख छ ।

यस्तै, समितिले नीतिगतरूपमा बोर्डबाट निर्णय गर्नुपर्ने सचिवालयले समितिमा पेस गरेका विषयहरू समितिमा छलफल गरी राय परामर्श दिने काम पनि गर्नेछ ।

कल्याणकारी कार्य व्यवस्थापन समितिले वैदेशिक रोजगार कल्याणकारी कार्य, कामदारको स्वास्थ्य, पुनर्स्थापना, पुन:एकीकरण लगायतको कार्य गर्नेछ ।