काठमाडौं । पपगायक सञ्जय श्रेष्ठका थुप्रै हिट गीतमध्येको एउटा गीत हो, ‘">माया मेरी माया...।’  सन् १९९२ मा निस्किएको ‘नयाँ मोडमा’ एल्बममा यो गीत समावेश थियो । 

यो गीत क्यासेटको साइड ‘बी’को तेस्रो स्थानमा राखिएको थियो । क्यासेटका राम्रा र सम्भावना बोकेका भनेर विश्वास गरिएका गीत साइड ‘ए’मा राखिन्थ्यो । क्यासेटमा आफूलाई राम्रो लागेका र स्रोतालाई पनि मन पर्छ भनेर अपेक्षा गरिएका गीत क्रमशः १, २, ३... गर्दै राख्ने चलन थियो ।  

“सामान्य बोलिचालिको भाषामा थियो, त्यसैले स्रोताले खासै मन पराउनुहुन्न होला भनेर हामीले यो गीत साइड ‘बी’को तेस्रो स्थानमा राखेका थियौँ,” सञ्जय बाह्रखरीसँग भन्छन्, “तर, पछि यही गीत स्रोताले मन पराइदिनुभयो । वास्तवमा यो लुकाइएको गीत थियो ।” 

यो गीत सञ्जयको सांगीतिक करिअरकै माइलस्टोन बन्यो । सञ्जयका अनुसार यो एल्बम ४८ लाख कपी बिक्री भयो । प्रतिक्यासेट चार रुपैयाँ रोयल्टी सञ्जय अथवा ‘क्रसरोड’ ब्यान्डको हातमा पर्थ्यो ।

“त्यो समय सर्वाधिक बिक्री हुने एल्मबमा यो पनि एक हो । गीत जसरी हिट भयो, त्यसैगरी एल्बम पनि बिक्री भयो,” सञ्जय भन्छन्, “हरेक महिना कम्पनीले रोयल्टी दिन्थ्यो । एक महिनामा एक लाख रुपैयाँसम्म रोयल्टी बुझ्थ्यौँ ।” 

४८ लाख कपीको चार रुपैयाँका दरले रोयल्टी आउँदा एक करोड ९२ लाख रुपैयाँ सर्जक तथा स्रष्टाको हातमा पर्छ ।