काठमाडौं । भक्तपुरमा भएको कुलप्रसाद आचार्य र उनका छोरा प्रवीणको हत्या घटनाको अनुसन्धान जारी रहेको प्रहरीले जनाएको छ । 

कुलप्रसादकै जेठा छोरा मिलन फरार रहेका छन् । “अहिलेसम्म मिलन पक्राउ परेका छैनन् । घटनाको अनुसन्धान जारी छ,” जिल्ला प्रहरी कार्यालय भक्तपुरका डीएसपी ढुण्डीराज न्यौपानेले बाह्रखरीसँग भने, “अहिले थप जानकारी दिने अवस्था छैन ।” 

खोटाङ स्थायी घर भएका आचार्य र छोरा प्रवीणको शव सोमबार बिहान भक्तपुर बालकोटको एक घरमा फेला परेको थियो । कुलप्रसाद जिल्ला हुलाक खोटाङका सुब्बा हुन् ।

शनिबार साँझ कुलप्रसाद, मिलन र प्रवीण सँगै खाना खाएर सुतेका थिए । तर, सोमबार बाहिरबाट ताल्चा लगाइएको र भित्र दुईवटा छुट्टाछुट्टै कोठामा शव फेला परेको थियो ।

धारिलो हतियार प्रयोग गरेर हत्या गरेको पाइएको प्रहरीले जनाएको छ । घरमा सँगै सुतेका जेठा छोरा फरार भएका हुन् । 

शव भक्तपुर प्रहरीले पोस्टमार्टमका लागि त्रिवि शिक्षिण अस्पताल महाराजगञ्ज पठाएको छ । 

कुलप्रसाद कामका लागि केही दिन अघिमात्रै काठमाडौं आएका प्रहरीले बताएको छ । छोराद्वय प्रवीण र मिलन पढ्न भक्तपुरमा बस्दै आएका थिए । चार वर्षदेखि उनीहरू भक्तपुरमा दुईवटा कोठा लिएर बस्दै आएका थिए । 

मिलन लोकसेवाको तयारी गरिरहेका थिए भने प्रवीण विज्ञान संकायका विद्यार्थी थिए ।