काठमाडौं । पोखराको फेवातालमा यही पुस १४ र १५ गते दोस्रो संस्करणको ‘ड्रागन बोट फेस्टिभल’ आयोजना गरिने भएको छ । पर्यटन प्रवर्द्धन गर्ने उद्देश्यसाथ गण्डकी प्रदेश सरकार, पोखरा महानगरपालिका, नेपालस्थित चिनियाँ दूतावास र नेपाल पर्यटन बोर्डको संयुक्त आयोजनामा फेस्टिभल गर्न लागिएको हो ।

प्रतियोगिताको दोस्रो संस्करणमा नेपालका ११, चीनका आठ र सिंगापुरका एक गरी २० समूहको सहभागिता रहनेछ । २०० र ५०० मिटर दूरीमा आयोजना गरिने प्रतियोगितामा दुवैका विजेता समूहले पाँच हजार अमेरिकी डलर, उपविजेताले दुई हजार र तेस्रो हुनेले एक हजार २०० डलर पुरस्कार प्राप्त गर्नेछन् । सहभागी बाँकी १७ समूहलाई प्रतिसमूह ५०० डलर प्रदान गरिने आयोजकले जनाएको छ ।

उक्त फेस्टिभलको जानकारी दिन आइतबार काठमाडौंमा आयोजित पत्रकार सम्मलेनमा नेपाल पर्यटन बोर्डका कार्यकारी अधिकृत दीपकराज जोशीले यसले नेपालको पर्यटन क्षेत्रको प्रवर्द्धन हुने बताए ।

चीन सरकारको अगुवाइमा नेपालमा पहिलोपटक सन् २०२३ मा ड्रागन बोट फेस्टिभल सफलतापूर्वक आयोजना गरिएको थियो । चीनले यसखालको प्रतियोगिता विश्वका ५० देशमा आयोजना गर्ने गरेको छ ।

यो प्रतियोगिताले नेपाल र चीनका नागरिकबीच सुमधुर सम्बन्ध स्थापित हुनाका साथै यहाँको पर्यटन प्रवर्द्धन हुने अपेक्षा राखिएको जोशीले जनाए ।

चिनियाँले मनाउने यो पर्वलाई सन् २००९ देखि युनेस्कोले मानवताको अमूर्त सांस्कृतिक सम्पदा मानेको छ । चीनमा प्रचलित लुनार क्यालेन्डरको पाँचौँ महिनाको ५ गते त्यहाँ ड्रागन बोट फेस्टिभल आयोजना गरिन्छ ।

चिनियाँ भाषामा ‘डुआन्वु जी’ भनिने ड्रागन बोट फेस्टिभल चीनका चार ठूला चाडमध्ये एक हो । चीनमा ड्रागनलाई सकारात्मक शक्तिका रूपमा लिने गरिन्छ ।

चीन नेपालको प्रमुख पर्यटकीय बजार पनि हो । सन् २०१९ मा चीनबाट एक लाख ६९ हजार ५३४ र २०२३ मा ६० हजार ८७४ पर्यटकले नेपाल भ्रमण गरेका थिए । २०२४ को जनवरीदेखि नोभेम्बरसम्म ९२ हजार ८४८ चिनियाँ पर्यटकले नेपाल भ्रमण गरेका बोर्डले जनाएको छ ।