नेपाली घरेलु खेलकुद क्षेत्रमा तीन साता आकर्षक पर्व बन्यो नेपाल प्रिमियर लिग (एनपीएल) । क्रिकेटको ‘क्रेज’ले काठमाडौंको मीन पचासको चिसोलाई समेत ततायो । सँगै नेपालमा क्रिकेटको भविष्य भएको पुष्टि गर्‍यो । एनपीएल नेपालको सर्वाधिक राशि पुरस्कार भएको खेल बनेको छ ।

नेपाली खेलकुदको भविष्य छैन भन्ने परम्परागत धारणालाई कम्तीमा क्रिकेटले बदलिदिएको छ । केही यता नेपाली खेलाडीले क्रिकेटमा कीर्तिमान कायम गर्दै आएकाले यसप्रति जनस्तरमा समेत आकर्षण बढेको हो । एनपीएलमा पनि विश्वका क्रिकेट प्रेमीले थुप्रै रोमाञ्चक क्षण र कीर्तिमान कायम भएको देख्न पाए ।

एनपीएलको रोमाञ्चकारी खेलले नेपालमा यसको व्यावसायिक विकास गर्न सकिन्छ भन्ने सन्देश दिएको छ । प्रतियोगिताको पहिलो संस्करण जनकपुर बोल्ट्सलाई ‘च्याम्पियन’ उपाधि दिएर शनिवार कीर्तिपुरस्थित त्रिवि क्रिकेट मैदानमा समाप्त भयो । 

विश्व मानचित्रमा नेपाली खेलकुदको उपस्थिति कमजोर रहँदा नेपाली क्रिकेटको यो महाकुम्भले त्यसलाई चिर्न ठूलै प्रयत्न गरेको छ । स्टार स्पोर्ट्समा देखिने विदेशी खेलाडीलाई आदर्श मानेर हुर्केका नेपाली क्रिकेटर आज आफैँ विश्वभरका क्रिकेटप्रेमीको 'हिरो' बनिरहेका छन् । 

उत्साहपूर्ण एवं सहज शैलीमा जसरी एनपीएल सकियो त्यस निम्ति नेपाल क्रिकेट संघ (क्यान) लाई पनि धन्यवाद दिनैपर्छ । सँगै एनपीएलले ‘संघीयता’लाई स्थापित गरेको आभास दिलाइरह्यो जब क्रिकेट मैदानमा समर्थकले आफ्नो टोलीलाई गौरवसाथ प्रदेशसँग जोडिरहे । तिनले क्रिकेट रंगशालामा आफ्नो प्रदेशको भाषा–भाका, संस्कृति, हाउभाउसहति बेजोड समर्थन प्रस्तुत गरिरहँदा देशको संघीय संरचना प्रष्ट रुपमा झल्कन्थ्यो । 

यद्यपि, केही दर्शकबाट गैरजिम्मेवार व्यवहार प्रदर्शन पनि भयो । त्यस्ता असहिष्णु एवं अप्रिय व्यवहार प्रदर्शन गर्नेलाई कानुनी कारबाहीको दायरामा ल्याइनुपर्छ भन्माने सरकार र क्यान दुवै सजग रहुन् । सम्भावित ‘म्याच फिक्सिङ’ रोक्न सुरक्षा निकायले राम्रैसँग निगरानी गरेको रहेछ । खेलसँगै धन्दा गर्न तम्सेका सट्टेबाजहरूमध्ये केही त पक्राउ पनि परे ।

मंसिर १५ गते एनपीएलको उद्घाटनका क्रममा आयोजक क्यानप्रति व्यवस्थापनमा भएका कमजोरीका कारण थुप्रै प्रश्न उठेको थियो । तर, प्रतियोगिता चल्दै जाँदा क्यानको यो पहिलो कदममा काँध थाप्ने र हैसेमा होस्टे गर्ने पनि बढ्दै गए ।

क्रिकेटको भौतिक संरचनामा सरकारी चासो र कनिका बजेटबीच क्यानको यस प्रयास नेपाली खेलकुदमा नयाँ क्रान्तिको उद्घोष गरेको छ । यसमा सबैभन्दा ठूलो साथ मैदानभित्रका ११ खेलाडीबाहेक नेपाली क्रिकेटमा ‘टुवेल्थ म्यान’ बनेका समर्थकले दिए ।

यी नेपाली क्रिकेटप्रेमीले प्रतियोगिता सञ्चालन भएको १८ दिनसम्म त्रिवि क्रिकेट मैदानले समर्थकको न्यास्रो मान्नुपर्ने स्थिति सिर्जना हुनै दिएनन् । स्थान साँगुरो हुँदा क्यानले समर्थकको प्रभावकारी व्यवस्थापनमा ठूलै कसरत गर्नुपरेको थियो । यसले नेपाली क्रिकेटमा अन्तर्राष्ट्रियस्तरको रंगशाला अत्यावश्यक भएको देखाइसक्यो ।

देशको राजनीतिक स्थितिबाट उत्पन्न वितृष्णा र अर्थतन्त्रमा देखिएको निराशाबीच एनपीएल नेपाली जनतालाई खुसी बनाउने नयाँ आयाम बन्यो ।  प्रतियोगिताका निम्ति क्यान र एनपीएलका आठ टिमलाई व्यापारिक घरानाले दिएको साथ उस्तै तारिफयोग्य छ । नेपालको खेलकुद क्षेत्रसँग सहकार्य गर्न तयार रहेका यी व्यापारिक क्षेत्रको चासो र उत्साहलाई कायम राख्न राज्यले क्यानसँग समन्वय गर्न आवश्यक छ ।

धेरैलाई रंगशालाभित्रै रहेर क्रिकेट हेर्ने रहर थियो तर त्यो सानो र अव्यवस्थित रंगशालाले धेरैको रहर पूरा हुन पाएन । अब ‘क्रिकेट क्रेज’ र व्यावसायिक बजारको सम्भावना बुझ्दै अन्तर्राष्ट्रियस्तरकै रंगशाला निर्माणलाई प्रामिकता दिइनुपर्छ । त्यसो त, प्रधानमन्त्री स्वयंले अन्तर्राष्ट्रियस्तरको प्याराफिट र फ्लडलाइट जडानलाई तीव्रता दिन निर्देशन दिए तर नेपालमा निर्देशन कार्यान्वयन नहुने समस्य निकै चर्को छ । एनपीएलको दोस्रो संस्करण आयोजना हुँदा आधुनिक भौतिक पूर्वाधारयुक्त रंगशाला बन्नुपर्छ ।

उपाधि जता गए पनि यो कुनै एक टोलीको जित नभई समग्र नेपाली क्रिकेटको जित बनेको छ । विजेता टोली जनकपुरसँगै उपविजेता, तेस्रो, चौथो र सहभागी आठै टिमलाई बधाई । नेपाली क्रिकेटको क्रेजलाई कायम राख्न क्यानलाई शुभकामना !