झापा । झापाको बुद्धशान्ति गाउँपालिका–३ मा चार किलो प्रतिबन्धित लागुऔषध गाँजासहित २९ वर्षीया दुर्गा धिमाल पक्राउ परेकी छन् ।

बुधबारे इलाका प्रहरी कार्यालयको टोलीले गए राति ११ः३० बजे धिमालको घरमा खानतलासी गर्दा सुत्ने कोठाबाट चार किलो गाँजा, नगद तीन लाख ६ हजार ८७० रुपैयाँ र भारु दुई हजार ३०० बरामद गरेको जिल्ला प्रहरी कार्यालयका सूचना अधिकारी कृष्णकुमार चन्दले जानकारी दिए ।

लागुऔषध कारोबार भइरहेको सूचना प्राप्त गरी प्रहरी टोली धिमालको घरमा पुगेको थियो । पक्राउ परेकी धिमाललाई धुलाबारी इलाका प्रहरी कार्यालयमा राखिएको छ ।

घटनास्थलबाट गाँजा जोख्ने तराजु, ढक, लाइटर, प्याकेजिङ प्लास्टिक, चक्कु, कैँची, अचानो र हथौडा बरामद गरिएको प्रहरीले जनाएको छ । रासस