काठमाडौं । नेपाल बैंक लिमिटेडका तत्कालीन उपप्रबन्धक शशिकिरण श्रेष्ठ अदालतबाट दोषी ठहर भएको १३ वर्षपछि पक्राउ परे । तीन महिनाअघिदेखि प्रहरी वृत्त स्वयम्भूको कमान्ड सम्हालेका डीएसपी उद्धव भाट नेतृत्वको टोलीले गएको शुक्रबार उनलाई पक्राउ गरेको हो ।

उनी यसअघि देशबाहिर लुकेर बसेका कारण पक्राउ नपरेका होइनन् । स्वयम्भू निवासी उनी काठमाडौंमै निर्बाध घुमफिर गरेर बसेका थिए । अदालतबाट दोषी ठहर हुँदा पनि कानुन कार्यान्वयन गराउने प्रहरीलाई प्रभावमा पारेर उनी जोगिँदै आएको खुलेको छ ।

श्रेष्ठ नेपाल बैंक लिमिटेडमा कार्यरत रहेको समयमा विभिन्न कर्जा प्रवाह गर्दा अख्तियारको दुरुपयोग गरी ३९ करोड ८९ लाख ३१ हजार ७८४ रुपैयाँ हानिनोक्सानी गरेको ठहर भएको थियो ।

उक्त कसुरसहितका दुई मुद्दामा विशेष अदालतले उनलाई ६/६ महिना कैद सजाय तोकेको थियो । ०६८ भदौ ६ गते विशेष अदालतले कर्जा प्रवाह गर्ने श्रेष्ठसहित ऋणी लक्ष्मीप्रसाद आचार्यलगायत व्यक्तिहरूलाई दोषी ठहर गरेको थियो ।

विशेषको फैसलाविरुद्ध उनीहरू सर्वोच्च अदालत पुगेका थिए । सर्वोच्चका तत्कालीन न्यायाधीश विश्वम्भरप्रसाद श्रेष्ठ र आनन्दमोहन भट्टराईको इजलासले समेत ०७३ कात्तिक २५ मा विशेषकै फैसला सदर गरेको थियो ।

तर, उनी पक्राउ पर्नबाट जोगिँदै आएका थिए । शुक्रबार समेत उनलाई पक्राउ नगर्न स्वयम्भू प्रहरीले तीव्र दबाब झेलेको स्रोतको भनाइ छ । उनलाई स्वयम्भू प्रहरीले शुक्रबार नै जिल्ला प्रहरी परिसर काठमाडौंमा बुझाइसकेको छ ।

“अहिले पनि शशिकिरण श्रेष्ठ पक्राउ परेपछि राजनीतिक दलका केही नेता र केही प्रहरी अधिकारीबाटै उनलाई छोड्न दबाब आएको थियो,” काठमाडौं प्रहरी स्रोतले बाह्रखरीसित भन्यो, “पक्राउ नगर्न त पहिल्यैदेखि दबाब थियो ।”

उनलाई भद्रकालीस्थित काठमाडौं प्रहरीको हिरासतमा राखिएको छ । शनिबार सार्वजनिक बिदा र आइतबार पनि उधौली पर्वका कारण बिदा भएकाले उनलाई सोमबार मात्र अदालतमा पेस गर्ने प्रहरीको तयारी छ ।