काठमाडौं । नेपाल प्रिमियर लिग (एनपीएल) चितवन राइनोजले जनकपुर बोल्ट्सविरुद्ध ३२ रनको जित निकालेको छ । चितवनको यो जितसँगै पोखरा एभेन्जर्स र विराटनगर किंग्स प्रतियोगिताको प्लेअफ समीकरणबाट बाहिरिएका छन् ।

जितसँगै प्लेअफ समीकरणमा कायम रहेको चितवनले सात खेलबाट आठ अंक जोडेको छ । योसँगै लिगका शीर्ष चार टिमले आठ वा सोभन्दा धेरै अंक जोडेको हुँदा विराटनगर र पोखरा अन्तिम खेलअगावै प्लेअफ समीकरणबाट बाहिरिएका हुन् ।

यी दुवै टिमले ६ खेलबाट चार अंक जोडेका छन् । अन्तिम खेलमा जित निकाले पनि यी दुई टिमले ६ अंक मात्र जोड्नेछन् । 

लिगमा जनकपुरले १० अंक जोडेको छ । सुदूरपश्चिम रोयल्स, कर्णाली याक्स र चितवनले समान आठ अंक छ । यसमध्ये जनकपुरले प्लेअफ यात्रा तय गरिसकेको छ ।

शनिबार कीर्तिपुरस्थित त्रिवि क्रिकेट मैदानमा चितवनले प्रस्तुत गरेको १८१ रनको लक्ष्य पछ्याउने क्रममा जनकपुरले १८ ओभरमा सबै विकेट गुमाएर १४८ रन मात्र बनाउन सक्यो ।

जनकपुरका मध्यक्रम ब्याटर जिम्मी निसमले ६५ रन बनाए पनि टिमको हार टार्न सकेनन् । आक्रामक रूपमा प्रस्तुत भएका जिम्मीले २४ बलमा पाँच चौका र ६ छक्का प्रहार गरे ।

उनले १८ बलमै अर्धशतक बनाउँदै प्रतियोगितामा सबैभन्दा छिटो ५० रन बनाउने खेलाडीको कीर्तिमान समेत बनाए । जिम्मीले यसअघि आन्द्रियस गौसको नाममा रहेको यो कीर्तिमान आफ्नो नाममा बनाएका हुन् । पोखरा एभेन्जर्सका गौसले यसअघि लुम्बिनी लायन्सविरुद्ध २० बलमा ५० रन बनाउँदै यो कीर्तिमान बनाएका थिए ।

६६–५ को स्थितिबाट जिम्मीले छैटौँ विकेटका निम्ति मोहमद मोहसिनसँग २६ बलमा ६० रनको साझेदारी गर्दै जनकपुरको इनिङ सम्हाल्ने प्रयास गरेका थिए ।

मोहसिने १२ बलमा दुई चौकासहित १३ रन बनाए । ओपनर आसिफ शेखले २६ बलमा चार चौकासहित २३ रन थपे । शुभ कंशाकारले १२ बलमा दुई चौका र एक छक्कासहित १५ रन बनाए ।

शनिबार पुनः जनकपुरका शीर्ष क्रम चल्न सकेन । जनकपुरका कप्तान अनिल साह आठ रनमै पभेलियन फर्किए । लहिरु मिलान्थाले पनि स्कोर बोर्डमा एक रन मात्र थप्न सके । हर्ष थाकेरले ६ रन बनाए । 

जनकपुरका अरनिको यादव ‘डायमन्ड डक’ भए । उनी एक बल नखेली रनआउट भएका थिए । ललितनारायण राजवंशी ‘डक’ भए ।

जनकपुरविरुद्ध चितवनका सोहेल तान्विर, कप्तान कुशल मल्ल र रिजन ढकालले समान दुई विकेट लिए । सोहेलले लहिरु मिलान्था र जिम्मी निसमको विकेट लिएका थिए । कुशलले शुभ कंसाकार र ललित राजवंशीको विकेट लिए । रिजनले जनकपुरका अनिल साह र शेर मल्ललाई पभेलियनको दिशा देखाए ।

अमरसिंह रौटेलाको नाममा एक विकेट रह्यो । जनकपुरका तीन ब्याटर रनआउट भएका थिए ।

पहिलो इनिङ : चितवनका कप्तान कुशलको अर्धशतक 
त्यसअघि, टस जितेर ब्याटिङमा उत्रिएको चितवनले निर्धारित २० ओभरमा पाँच विकेट गुमाएर १८० रन बनाएको थियो ।

चितवनका कप्तान कुशल मल्लले सर्वाधिक ७२ रन बनाए । एनपीएलमा कुशलको यो पहिलो अर्धशतक हो । योसँगै कुशल प्रतियोगितामा अर्धशतक बनाउने १९औँ ब्याटर बने ।

५३ रनमा खेलिरहँदा जीवनदान पाएका कुशलले ४१ बलमा तीन चौका र सात छक्का प्रहार गरे । जिम्मी निसमले बलिङ गरेको १६.३ ओभरमा आसिफ शेखले कुशलको क्याच ‘मिस’ गरेका थिए ।

कुशलले ५५–३ को स्थितिबाट रवि बोपारासँग ११३ रनको शतकीय साझेदारी गर्दै चितवनलाई बलियो योगफलसम्म पु¥याएका थिए । कुशललाई १९औँ ओभरको चौथो बलमा जिम्मीले अनिल साहबाट क्याच गराए ।

बोपाराले ४४ रन बनाए । अर्धशतक बनाउन ६ रनले चुकेका बोपाराले ३२ बलमा पाँच चौका र एक छक्का प्रहार गरे । उनलाई २०औँ ओभरको दोस्रो बलमा ललितले अनिल साहबाट क्याच गराएका थिए ।

बसिल हमिदले दुई र सोहेल तान्विरले पाँच रनमा अविजित रहे ।

ओपनर हसन एसाखिलले २८ रन बनाए । हर्ष थाकेरले बलिङ गरेको सातौँ ओभरको चौथो बलमा विकेटकिपर लहिरु मिलान्थाबाट क्याच हुनुअघि एसाखिलले १९ बलमा चार चौका र एक छक्का प्रहार गरे । 

अर्का ओपनर विपीन रावत भने तीन रनको सस्तै स्कोरमा पभेलियन फर्किए । विपीनलाई जनकपुरका ललितनारायण राजवंशीले तेस्रो ओभरको चौथो बलमा कप्तान अनिल साहबाट क्याच गराएका थिए ।

ललितले दुई विकेट लिए । जनकपुरबाट सबैभन्दा किफायती बलर बनेका ललितले चार ओभर बलिङ गर्दा दुई मेडन फ्याँक्दै ११ रन मात्र खर्चिए । हर्ष थाकेर, मोहमद मोहसिन र जिम्मी निसमले समान एक विकेट लिए ।

शनिबारै पहिलो खेलमा काठमाडौं गुर्खाजले पोखरा एभेन्जर्सविरुद्ध ६ विकेटको जित निकालेको थियो ।