काठमाडौं । ओपनर स्टेफन एस्किनाजीको अर्धशतकप्रेरित काठमाडौं गुर्खाजले नेपाल प्रिमियर लिग (एनपीएल) अन्तर्गत जित्नैपर्ने खेलमा पोखरा एभेन्जर्सविरुद्ध ६ विकेटको सहज जित निकालेको छ । शनिबार कीर्तिपुरस्थित त्रिवि क्रिकेट मैदानमा सम्पन्न खेलमा पोखराले प्रस्तुत गरेको १३९ रनको लक्ष्य काठमाडौंले १४.१ ओभरमा चार विकेट गुमाएर पूरा गर्‍यो ।

काठमाडौंको जितमा ओपरन स्टेफन एस्किनाजीले ६० रन बनाए । उनले ३४ बलमा १० चौका प्रहार गरे । एस्किनाजीले पहिलो विकेटका निम्ति माइकल लेभिटसँग ५.३ ओभरमा ५८ रनको साझेदारी गर्दै काठमाडौंलाई उत्कृष्ट सुरुआत दिलाएका थिए । 

लेभिटले १८ बलमा ६ चौका र एक छक्कासहित ३२ रन जोडे । यस्तै, गेरहार्ड इरास्मसले १० बलमा एक चौका र तीन छक्कासहित २५ रन थपे । भीम सार्कीले २० बलमा एक चौका र एक छक्कासहित २२ रन बनाए । कप्तान करण केसी एक रन बनाएर आउट हुँदा राशिद खान एक विकेटमा अविजित रहे ।

पोखराका विपीन खत्रीले तीन विकेट लिए । तीन ओभर बलिङ गरेका विपीनले १९ रन खर्चिए । माइकल लियस्कको नाममा एक विकेट रह्यो ।

त्यसअघि टस हारेर ब्याटिङमा आएको पोखराले निर्धारित २० ओभरमा आठ विकेट गुमाएर १३८ रनको योगफल बनाएको थियो ।

पोखराका रेमोन रेफरले सर्वाधिक ४१ रन बनाए । उनले ३० बलमा एक चौका र तीन छक्का प्रहार गरे । ओपनर दिनेश खरेलले ३८ रन बनाए । दिनेशले २५ बलमा ६ चौका र एक छक्का प्रहार गरे ।

दिलीप नाथले २४ बलमा दुई छक्कासहित २७ रन बनाए । यसबाहेक, पोखराका अन्य ब्याटर दोहोरो अंकसम्म पुग्न सकेनन् ।

पोखराका अर्का ओपनर आन्द्रियस गौस ‘डक’ भए । कप्तान कुशल भुर्तेलले सात रन थप्दा विपीन खत्रीले चार रन बनाए । माइकल लियस्कले स्कोरबोर्डमा एक रनमात्र थपे । यस्तै, नारायण जोशी भने ‘गोल्डेन डक’ भए । 

पोखराविरुद्ध काठमाडौंका कप्तान करण केसी र राशिद खानले समान तीन विकेट लिए । चार ओभर बलिङ गरेका करणले २४ रनमात्र खर्चिए । यस्तै, गेरहार्ड इरास्मस र माइकल लेभिटको नाममा समान एक विकेट रह्यो ।

जितसँगै काठमाडौंले प्रतियोगिताको प्लेअफ पुग्ने सम्भावनालाई कायम राखेको छ  । प्रतियोगितामा ६ खेल खेलेको काठमाडौंले तीन खेलमा हार र तीन खेलमा जितको नतिजासहित ६ अंक नै जोडेको छ । 

काठमाडौंसँगको हारले पोखराको भने शीर्ष चारमा अटाउने सम्भावना निकै कमजोर बनेको छ । ६ खेलमध्ये दुईमा जित र चार खेलमा हार बेहोरेको पोखरा चार अंकसहित तालिकाको सातौँ स्थानमा छ ।