काठमाडौं । सूर्य नेपालका सिमरा र दमैलीमा भएका कारखाना तथा गोदाममा नै पुगरे कर अधिकृतले अनुसन्धान गरेका छन् । कम्पनीले ऐन विपरीत ‘सूर्य फ्युजन’ चुरोट ‘फ्रि फ्लो’ लेखिएको ‘एक्ट्रा’ बट्टामा पसल–पसलमा वितरण गरेपछि करछलीको अशंकामा आन्तरिक राजस्व विभागले राजस्व कार्यालयलाई अनुसन्धान गर्न निर्देशन दिएको थियो । 

सोही अनुसार उद्योग भएका दुई स्थान सिमरा र दमैलीमा अनुसन्धान गरिएको छ । 

कानुन लत्याउँदै सूर्य नेपाल : ‘सूर्य फ्युजन’ चुरोट बेच्न गैरकानुनी हतकण्डा 

आन्तरिक राजस्व कार्यालय सिमराका सूचना अधिकारी वसन्त नेपालका अनुसार उद्योग र गोदाममा नै गएर अनुसन्धान गरिएको हो । यी बट्टा कहाँबाट आए भनेर अब विभागले नै अनुसन्धान गर्ने नेपाल बताउँछन् । “आन्तरिक राजस्व विभागले हामीलाई सूर्य फ्यूजन चुरोटको बारेमा बुझ्न लगाएको थियो । कार्यालयले फिल्डमा गएर पनि बुझ्यो,” उनले बाह्रखरीसित भने, “काठमाडौंमा यो चुरोट लन्च गरेको भन्ने सुनिएको छ । पोखरामा पनि केही समयपछि लन्च गर्ने तयारी रहेको बुझिएको छ ।” 

कम्पनीले भरखरै बजारमा ल्याएको नयाँ प्याकेट ‘सूर्य फ्युजन’को प्रचार गर्न अर्काे नयाँ बट्टा प्रयोग गरेको र बजारमा प्रचारप्रसार गरेको छ । कम्पनीले बाहिर कुनै पनि चित्र तथा अन्तसुल्क स्टिकर नराखी आकर्षक बट्टामा चुरोट चोक–चोकका किराना पसललाई वितरण गरेको पाइएको छ । 

‘फ्रि फ्लो’ लेखिएको चिटिक्क परेको बट्टामा कम्पनीले ‘सूर्य फ्युजन’ चुरोट राखेर पसल पसलमा दिने गरेको छ ।