विराटनगर । नेपाली कांग्रेसका नेता शेखर कोइराला पक्षको विराटनगरमा आयोजित प्रदेशस्तरीय भेला सम्पन्न भएको छ । कांग्रेसको केन्द्रीय कार्यालयले रोक्ने प्रयास गरे पनि सफल हुन सकेन । भेलामा कोसी प्रदेशका अधिकांश पालिकाका सभापति सहभागी थिए ।

कोइरालाको गृहजिल्लाका कांग्रेस कार्यकर्ताको उपस्थितिले कार्यक्रमस्थल विराटनगरको जैन भवन खचाखच थियो । कार्यक्रममा कोइरालाले पालिका सभापतिहरूको संरक्षणमा आफूले कुनै कसर नछाड्ने बताए ।

"तपाईंहरू कुनै धाकधम्की बाट नडराउनुहोस्, तपाईंहरूको संरक्षणको जिम्मा मेरो हो," कोइरालाले भने ।

नेता कोइरालाले पार्टीको १५औँ महाधिवेशनबाट गलत कुरा हुन नदिने र कार्यकर्ताको संरक्षण आफूले गर्ने बताए । तर, महाधिवेशन तोकिएको समयमा हुनेमा भने आशंका रहेको उनको भनाइ छ ।

उनले संविधान संशोधनको विषयमा सरकार गम्भीर नभएको र खासै ध्यान नदिएको बताए । यस विषयमा अन्य दलसँग समेत छलफल गर्नुपर्ने उनको जोड थियो  ।‌

"सरकार बनेको चार महिना लाग्दा समेत सत्ता पक्ष र अन्य दलसँग छलफल गर्न सरकारले कुनै चासो देखाएको छैन," उनले भने ।

कोइराला पक्षले विराटनगरमा भेला राखेपछि त्यसलाई रोक्न पार्टी केन्द्रीय कार्यालयले जिल्ला सभापतिहरूलाई पत्राचार गरेर 'कार्यक्रम पार्टीको आधिकारिक नभएकाले सहभागी नहुन' भनेको थियो । तर, यसका बाबजुद कोइराला पक्षका अधिकांश नेता कार्यक्रममा सहभागी भए ।

नेताहरू मिनेन्द्र रिजाल, सुनिल शर्मा, राजीव कोइराला, केदार कार्कीलगायत केन्द्रीय र प्रदेशस्तरीय नेताहरू भेलामा सहभागी थिए ।

कार्यक्रममा बोल्दै नेता रिजालले रोकटोक र निषेधको राजनीति कांग्रेसको संस्कार नभएको बताए ।। "एकअर्काको मुन्टो बटार्ने काम कोही कसैबाट हुनुहुँदैन," उनले भने ।

नेता गुरु घिमिरेले पार्टीलाई चलायमान गर्न कांग्रेसका जुन नेताले पनि कार्यक्रम गर्न सक्ने बताए । 

कोइरालाको भेलामा ६१ जना पालिका सभापति सहभागी भएको संस्थापन पक्षको दाबी छ । तर, ११३ जना सहभागी भएको कार्यक्रमका संयोजक नेपाली कांग्रेस विराटनगर सभापति दिपक चापागाईंले बताए ।