काठमाडौं । लज्जास्पद हारपछि पोखरा एभेन्जर्सका प्रशिक्षक राजीव कुमारले ट्वान्टी–२० क्रिकेटमा कहिलेकाहीँ खराब नतिजा आउने भएकाले हारबाट आफू धेरै चिन्तित नरहेको बताएका छन् । 

चितवन राइनोजसँग मंगलबार फराकिलो हार सामना गरेपछि प्रशिक्षक राजीवले टी–ट्वान्टीमा कहिलेकाहीँ यस्तो नतिजा आउने भएकाले आफू धेरै चिन्तित नभएको बताएका हुन् । साथै, आफ्नो टोलीमा धेरै क्षमतावान खेलाडी रहेकाले बलियो भएर आउनेमा उनी विश्वस्त देखिए । 

१५०/१६० को लक्ष्य भेट्टाउन सहज हुने भए पनि आज खेल आफ्नो पक्षमा आउन नसकेको उनको भनाइ थियो । साथै उनले ६/७ को अवस्थामा पुग्नु पनि सहज नतिजा नभएको र अन्तर्राष्ट्रिय क्रिकेटमा पनि कहिलेकाहीँ यो अवस्थाको सामना गर्नुपर्ने उल्लेख गरे ।

तर, टी ट्वान्टी–२० मा सधैँ यस्तै अवस्था नहुने र आगामी खेलमा सुधार गर्ने उनको लक्ष्य छ । आज पहिलो खेल भएकाले योजनाअनुरूप हुन नसकेको उनले उल्लेख गरे ।

प्रशिक्षक राजीवले केही गल्ती भएको र चितवनले पनि राम्रो बलिङ गरेको बताए ।

यता एकै ओभरमा तीन विकेट लिएका चितवनका बलर रिजन ढकालले मेहनत गरेअनुरूप नतिजा प्राप्त भएको र यो सफलतामा बोल्ने आफूसँग शब्द नै नभएको बताए । पोखराको अन्तिमसम्म नारायण जोशी र विपीन खत्रीले राम्रो ब्याटिङ गरिरहेको तथा अन्तिम बलसम्म राम्रो बलिङ गर्ने टोलीको लक्ष्य रहेको समेत उनको भनाइ छ । सोहेल तान्विर र रवि बोपारा जस्ता अनुभवी खेलाडीबाट आफूहरूले धेरै कुरा सिक्न पाएको उनले उल्लेख गरे ।