काठमाडौं । प्रधानमन्त्री केपी शर्मा ओलीले चिनियाँ राष्ट्रपति सी चिनफिङसित शिष्टाचार भेटवार्ता गरेका छन् । चीनको चारदिने औपचारिक भ्रमणमा रहेका उनी र सीबीच मंगलबार बेइजिङमा भेटवार्ता भएको हो ।

सीसँगको भेटअघि प्रधानमन्त्री ओलीले बेइजिङको तियानमेनस्क्वायरस्थित चिनियाँ जनक्रान्तिका सहिदहरूको स्मारकमा पुष्पहार अर्पण गरी श्रद्धाञ्जली प्रकट गरेका थिए ।

मंगलबारै यसअघि प्रधानमन्त्री ओली र उनका चिनियाँ समकक्षी ली छ्याङबीच भेटवार्ता भएको थियो । ओलीलाई लीले ग्रेट हल अफ पिपलमा आयोजित समारोहमा स्वागत गरेका थिए ।

प्रधानमन्त्री ओलीको सम्मानमा चिनियाँ जनमुक्ति सेनाले ‘गार्ड अफ अनर’ प्रस्तुत गरेको थियो । समारोहमा अरू चिनियाँ नेता पनि सहभागी थिए ।

प्रधानमन्त्री ओलीले समकक्षी लीलाई आफ्नो भ्रमण दलका सदस्यको परिचय गराएका थिए । चिनियाँ प्रधानमन्त्रीले पनि आफ्ना अरू नेताको परिचय गराएका परराष्ट्र मन्त्रालयले जानकारी गराएको छ ।

त्यसलगत्तै दुई मुलुकका प्रधानमन्त्रीस्तरमा द्विपक्षीय भेटवार्ता भएको थियो ।

त्यसपछि नेपाल–चीनबीच नौ समझदारी (एमओयू) तथा सम्झौतापत्रमा हस्ताक्षर भयो ।

• यी हुन् नेपाल र चीनबीच हस्ताक्षर भएका नौ सम्झौता

प्रधानमन्त्री ओली नेतृत्वको ८७ सदस्यीय प्रतिनिधिमण्डल सोमबार (हिजो) बेइजिङ पुगेको हो । उनलाई बेइजिङ क्यापिटल अन्तर्राष्ट्रिय विमानस्थलमा चिनियाँ कम्युनिस्ट पार्टीका वैदेशिक मामिलाका उपमन्त्री सुन बेइदोङले स्वागत गरेका थिए ।

प्रधानमन्त्री ओली यही मंसिर २० गते स्वदेश फर्कने भ्रमण तालिका छ ।

थप तस्बिर हेर्नोस्–