काठमाडौं । नेपाल प्रिमियर लिग (एनपीएल)को पहिलो खेलमा विराटनगर किंग्स् र जनकपुर बोल्ट्सबीच प्रतिस्पर्धा हुँदा क्रिजमा कुल १५ जना ब्याटिङमा आए । जसमा नौ नेपाली र ६ विदेशी ब्याटर थिए ।

पहिलो दिनको खेलमा विराटनगर र जनकपुरका खेलाडीले समग्रमा कुल २५८ रन बनाए । जसमा दुई अर्धशतक सामेल छन् । यी दुवै अर्धशतक विदेशी खेलाडीबाट आएको थियो । मध्यम योगफलको खेलमा दुवै टिमका अरु ब्याटर भने संघर्षरत देखिँदा नेपाली ब्याटरको प्रदर्शन भने झनै निराशजनक रह्यो ।

शनिबारको खेलमा नेपालका नौ ब्याटरमध्ये कोही पनि दोहोरो अंकमा रन जोड्न सफल भएनन् । खेलको पहिलो इनिङमा विराटनगरबाट सात र जनकपुरबाट दुई नेपाली ब्याटर ब्याटिङ गर्न क्रिजमा उत्रिए । तर, कसैको पनि व्यक्तिगत स्कोर १० रन पुग्न सकेन ।

“विकेट सहज छैन भन्ने सुरुदेखि नै बुझेका थियौँ । विदेशी खेलाडीले विकेटको यो स्थितिलाई बुझेर समय लिँदै खेले । हामीले पनि समय लिन सकेको भए रन बन्थ्यो । तर, त्यसो गर्न सकेनौँ । हामीले क्रिजमा टिकेर खेल्न विदेशी खेलाडीबाट सिक्नुपर्छ,” खेलपछि जनकपुरका कप्तान अनिल साहले ब्याटिङमा संघर्ष गरिरहेका नेपाली खेलाडीले विदेशी खेलाडीबाट सिक्नुपर्ने बताउन कन्ज्युस्याइँ गरेनन् ।

गप्टिल र मिलान्थाको अर्धशतक, नेपाली ब्याटरको उच्च स्कोर सात रन

कीर्तिपुरस्थित त्रिवि क्रिकेटमा भरिभराउ दर्शकमाझ जनकपुरले टस जित्दै फिल्डिङको निर्णय लियो । र, विराटनगरलाई ब्याटिङमा निम्त्यायो ।

जनकपुरका बलरसामु निरीह देखिएको विराटनगरबाट ओपनर मार्टिन गप्टिलबाहेक अन्यको प्रदर्शन उल्लेख्य रहन सकेन । विराटनगरले दोस्रो ओभरको पहिलो बलमा पहिलो विकेट गुमायो । जतिबेला पूर्वेली टोलीको स्कोरबोर्डमा ६ रनमात्रै थियो । अन्तिम विकेट गुमायो, १९औँ ओभरमा । स्कोरबोर्डमा थियो १२७ रनमात्रै ।

एक एन्डबाट लगातार विकेट गइरहँदा अर्कोतर्फ अनुभवी न्युजिल्यान्डका ब्याटर गप्टिल अडिक रहे । १–६ को स्थितिबाट गप्टिलले दोस्रो विकेटका निम्ति ओमानका अकिब इल्याससँग ४७ रनको साझेदारी गर्दै विराटनगरको स्कोरबोर्डलाई लयमा फर्काउने प्रयास गरेका थिए । यसमा गप्टिलले केहीबेर इल्यासले साथ पनि दिए । तर, स्कोरबोर्डमा ५३ रन हुँदा इल्यासलाई गुमाएपछि भने विराटनगरको विकेटपतन शृंखला रोकिएन ।

इल्यास आउट भएपछि सन्दीप लामिछाने नेतृत्वको टोलीले मध्यक्रम र न्युनक्रमबाट ब्याटरबाट सम्हालिदो साथ पाएन । यसपछि टोलीले ७४ रन जोड्दा बाँकी आठ विकेट गुमायो । विराटनगरले चौथो विकेटको रूपमा गप्टिललाई गुमाउँदा स्कोरबोर्डमा ९६ रन थियो । तर, यसपछि ३१ रन जोड्दा बाँकी ६ विकेट गुमायो ।

गप्टिलले ५५ रन बनाए । एनपीएलमा अर्धशतक बनाउने पहिलो ब्याटर बनेका गप्टिलले ४३ बलमा सात चौका र एक छक्का प्रहार गरे ।

विराटनगरबाट मध्यक्रममा आएका क्यानेडियन खेलाडी निकोलस किर्टोन नौ रनमै पभेलियन फर्किए । त्यसअघि विराटनगरले ओपनर लोकेश बमलाई पाँच रनको व्यक्तिगत स्कोरमा गुमाएको थियो ।

विराटनगरबाट मध्यक्रममै आएका बसिर अहमेदले सात रन मात्र थपे । राजेश पुलाीम एक रनमै पभेलियन फर्किए । अलराउन्डर प्रतिश जिसी र कप्तान सन्दीप लामिछानेले पनि क्रिजमा लामो समय बिताउन सकेनन् । उनीहरू क्रमशः दुई र सात रन बनाउँदै जनकपुरका बलरलाई विकेट दिए । स्कटिस ब्याटर क्रिस सोलले पनि चार रन मात्रै थपे । जितेन्द्र मुखियाले स्कोरबोर्डमा एक रन पनि थप्न सकेनन् । उनी ‘गोल्डेन डक’ भए । ११औँ नम्बरमा ब्याटिङमा निम्ति क्रिज छिरेका अनिल खरेल सात रनमा अविजित रहे ।

ब्याटिङमा कमजोर रहे पनि बलिङतर्फ भने नेपाली बलरको प्रदर्शन सन्तोषजनक रह्यो । पहिलो इनिङमा जनकपुरका ललितनारायण राजवंशीले तीन विकेट लिए । उनले लोकेशलाई बोल्ड गरे । बसिरलाई कप्तान अनिलबाट क्याच गराउँदा प्रतिशलाई पनि बोल्ड नै गरे ।

किशोर महतोले दुई विकेट लिए । उनले विराटनगरका कप्तान सन्दीप र जितेन्द्र मुखियालाई पभेलियनको दिशा देखाए । हर्ष थाकेरले दुई विकेट लिए । क्यानडाका थाकेरले मार्टिन गप्टिल र किर्टोनको विकेट लिएका थिए । बेन माइक र मोहमद मोहसिनको नाममा समान एक विकेट रह्यो । माइकले विराटनगरका क्रिस सोल र मोहसिनले अकिब इल्यासको विकेट लिए ।

दोस्रो इनिङ– राष्ट्रिय टिमका दुई ओपनरको निराशजनक प्रदर्शन

विराटनगरविरुद्ध सहज जित निकाले पनि जनकपुरको सुरुआत भने राम्रो रहेन । राष्ट्रिय टिमका दुई ओपनर ब्याटर आसिफ सेख र अनिल साह ओपनिङ जोडीको रूपमा क्रिजमा आएका थिए । तर, यी दुवै ब्याटर दोस्रो इनिङको १२ बलपछि नै पभेलियन फर्किए ।

जनकपुरको नेतृत्व गरिरहेका अनिलले पाँच रन बनाए । ‘मार्की’ खेलाडी आसिफ भने ‘डक’ भए । तीन बलको मात्रै सामना गरे । आसिफलाई विराटनगरका क्रिस सोलले र कप्तान अनिललाई प्रतिश जिसीले बोल्ड गरेका थिए ।

दोस्रो ओभर समाप्त हुँदा १५–२ को कठिन स्थितिमा थियो, जनकपुर । तर, यसपछि ब्याटिङका निम्ति आएका दुई विदेशी ब्याटरले जनकपुरलाई जितसम्म डोहोर्‍याए । जसमा थिए, श्रीलंकमूलका विकेटकिपर ब्याटर लहिरु मिलान्था र क्यानडाका हर्ष थाकेर ।

यी दुईले दोस्रो विकेटका निम्ति ११६ रनको साझेदारी गर्दा जनकपुरले १५.३ ओभरमा दुई विकेट गुमाएर १३१ रन बनायो । प्रतियोगितामा अर्धशतक बनाउने दोस्रो ब्याटर बनेका मिलान्थाले समय लिँदै ५३ खेले । यसक्रममा उनले नौ चौका र तीन छक्कासहित अविजित ७५ रन जोडे । मिलान्थालाई बलियो साथ दिएका थाकेरले ३३ बलमा दुई चौकासहित २९ रन बनाए ।

जितमा प्रफुल्लित अनिल, नेपाली समर्थक देख्दा दंग गप्टिल
सुरुआत कठिन रहे पनि जित सहज निकालेपछि जनकपुरका कप्तान अनिल प्रफुल्लित देखिए । प्रतियोगिताको अघिल्लो दिन ‘भोलि खेलमा नै रणनीति देखाउँला’ भनेका अनिलले खेलपछि टिम योजनाअनुसार प्रदर्शन देखाउन सफल भएको बताए ।

“पहिलो जितको आशा सबै टिमले गरेको हुन्छन् । पहिलो खेलमा दुई अंक लिन पाउँदा टिमका सबै खेलाडी उत्प्रेरित छन् । सबै खेल महत्त्वपूर्ण छन् । प्रतियोगिताका सबै टिम राम्रो छन् । यसले पनि अंक लिनु महत्त्वपूर्ण छ,” अनिलले भने, “योजनाअनुसार हामीले सामान्य क्रिकेट खेल्यौँ । आफ्नो उत्कृष्ट दियौँ । विदेशी खेलाडी आए पनि नआए पनि प्रतियोगिताका कुनै पनि टिम कमजोर छैनन् ।”

पहिलोपटक नेपाली फ्रेन्चाइजको अनुभव लिइरहेको न्युजिल्यान्डका पूर्वआक्रामक ब्याटर गप्टिल भने त्रिविमा समर्थकको भिड देख्दा दंग रहे । नेपाली समर्थकको क्रिकेट लगावबाट चकित बनेका गप्टिल उनीहरूको खुलेरै तारिफ गरे ।

“आज समर्थकको उपस्थिति ठूलो थियो । मैले यसमा निकै रमाइलो गरेँ,” उनले भने, “मैले नेपालीले क्रिकेट मन पराउँछन् भन्ने सुनेको थिएँ, आज देखेँ । काठमाडौंमा क्रिकेट खेल्न पाउँदा खुसी छु । आजभन्दा अघि नेपाली समर्थक देखेको थिइनँ, आज यहाँ देख्न पाएँ ।”