काठमाडौं । नेपाल क्रिकेट संघ (क्यान)को आयोजनामा हुने नेपाल प्रिमियर लिग (एनपीएल)को पहिलो संस्करण शनिबारदेखि सुरु हुँदै छ । आगामी पुस ६ गतेसम्म सञ्चालन हुने प्रतियोगितामा कुल आठ टिमले प्रतिस्पर्धा गर्दै छन् ।

प्रतियोगिताको पहिलो संस्करणमा विराटनगर किंग्स्, जनकपुर बोल्ट्स, चितवन राइनोज, काठमाडौं गुर्खाज, लुम्बिनी लायन्स, पोखरा एभेन्जर्स, कर्णाली याक्स र सुदूरपश्चिम रोयल्यले प्रतिस्पर्धा गर्दै छन् । सिंगल राउन्ड रोविन लिग पद्दतिमा हुने प्रतियोगितामा कुल ३२ खेल हुनेछन् । जसमा लिग चरणमा २८, प्लेअफमा तीन र फाइनलको एक खेल समावेश छन् ।

प्रतियोगिताको पूर्वसन्ध्यामा आयोजित पत्रकार सम्मेलनमा आठवटै टिमका कप्तानले आफ्ना टिम तयार रहेको बताए ।

रोहितकुमार पौडेल (लुम्बिनी लायन्स)
एकदमै राम्रो तयारी भएको छ । विशेषगरी हामीले सात, आठ दिन एक्स्ट्राटेक ओभलमा प्रशिक्षण गर्यौँ । हामी पूर्ण रूपमा तयार छौँ । एनपीएल नेपाली क्रिकेटको लागि एकदमै महत्त्वपूर्ण प्रतियोगिता हो । जसरी आईपीएलले भारतीय क्रिकेटलाई सहयोग गरेको छ, एनपीएल नेपाल क्रिकेटलाई सहयोग गर्छ जस्तो लाग्छ । जसरी अहिले एनपीएलको चर्चा छ । यसले पनि प्रतियोगिता भव्य हुने देखाउँछ । हामी सबै निक्कै उत्साहित छौँ ।

दीपेन्द्रसिंह ऐरी (सुदूरपश्चिम रोयल्स)
हाम्रो पनि तयारी राम्रो भइरहेको छ । मूलपानीमा तयारी खेल पनि खेल्यौँ । एनपीएलका लागि उत्साहित छौँ ।

कुशल भुर्तेल (पोखरा एभेन्जर्स)
हामीले पछिल्लो आठ–नौ दिन घरेलु मैदान पोखरामा गएर तयारी गरिरहेका थियौँ । भारतबाट आउनुभएका प्रशिक्षक टोलीले धेरै सहयोग गरिरहनु भएको छ । मूलपानीमा एउटा अभ्यास खेल खेल्ने मौका पनि पायौँ । टिम राम्रो संरचनामा छ । हामी प्रतियोगिताप्रति उत्साहित छौँ ।

सन्दीप लामिछाने (विराटनगर किंग्स्)
सुरुका केही दिन चुनौतीपूर्ण रह्यो । तर, पछि हामीबीच विस्तारै तालमेल बन्दै गयो । मलाई लाग्छ हामीसँग सन्तुलित टिम छ । सबैजना उत्साहित पनि छन् । एनपीएल आयोजना गराउन लागिरहनु भएका क्यानका सबैजनालाई धन्यवाद ।

अनिल साह (जनकपुर बोल्ट्स)
हामीले काठमाडौंमा मात्र आएर तयारी सुरु गर्यौँ । त्योभन्दा अघि हामीलाई उता मैदान उपलब्ध भएन । हामीले एउटा अभ्यास खेल खेल्ने मौका पायौँ । जसमा हामीले राम्रो गर्यौँ । हाम्रो टिम सन्तुलित छ । विदेशी खेलाडीको आगमनले टिमलाई बलियो र झनै सन्तुलित बनाएको छ । यो सबैका लागि राम्रो मञ्च हो । एनपीएलले जसरी चर्चा पाइरहेको छ, यसले पनि यसको स्तर देखाउँछ । हामी सबैजना उत्साहित छौँ ।

करण केसी (काठमाडौं गुर्खाज)
एनपीएलको लागि हाम्रो टिम पूर्ण रूपमा तयार छ । विदेशी खेलाडी पनि आइसक्नु भएको छ । पछिल्लो एक महिनादेखि घरेलु खेलाडीहरू अभ्यास गरिरहनु भएको छ । एनपीएलले सबै खेलाडीलाई आफ्नो कौशलता देखाउन मञ्च दिएको छ । सबै खेलाडीहरूले त्यो अवसरको सदुपयोग गर्नुहुनेछ भन्ने आशा छ । प्रतियोगिताका निम्ति क्यानलाई धन्यवाद ।

कुशल मल्ल (चितवन राइनोज)
हामीले पनि प्रतियोगिताका निम्ति चितवनमै तयारी गर्यौँ । त्यहाँ हामीले एक हप्ता जति अभ्यास गर्यौँ । एनपीएलको प्रत्यक्ष प्रसारण स्टार स्पोर्ट्सबाट हुने हुँदा विश्वले नै हामीलाई ध्यान दिन्छ जस्तो लाग्छ ।

सोमपाल कामी (कर्णाली याक्स)
तयारी एकदम राम्रो भयो । हामीले काठमाडौंमा आएर एक हप्ता प्रशिक्षण गर्यौँ । हाम्रो टिम युवा खेलाडीहरुले भरिएको छ । हामीले विदेशी खेलाडी पनि सबै अनुभवी ल्याएका छौँ । हाम्रो मुख्य उदेश्य विदेशी खेलाडीबाट केही सिकौँ भन्ने हो । एनपीएलले नेपाली घरेलु खेलाडीलाई एउटा मञ्च उपलब्ध गराएको छ । आशा छ यो प्रतियोगितामा राम्रो गरेर राष्ट्रको प्रतिनिधित्व गर्न सक्ने खेलाडी निस्किनेछन् ।