विराटनगर । कोसी प्रदेशमा नेपाली कांग्रेसका नेता शेखर कोइराला पक्षले प्रदेशभरका १३७ पालिका सभापतिको भेला बोलाएको छ । मंसिर १८ गते गर्ने घोषणा गरिएको भेलाको तयारी सुरु भइसकेको नेताहरूले बताएका छन् । भेलाको नारा दिइएको छ– ‘संगठनभित्र सक्रियतासहितको हार्दिकता, एकता र पहिचान : लोकतान्त्रिक पद्धतिमा विधि र विधानको कार्यान्वयन ।’

प्रथम प्रदेशस्तरीय पालिका सभापति भेलाको खुला सत्र विराटनगरको जैन भवनमा मंसिर १८ गते दिउँसो १ बजेदेखि सुरु हुने तय गरिएको छ । कार्यक्रममा प्रतिनिधिसभा सदस्यसमेत रहेका कांग्रेस नेता कोइराला प्रमुख अतिथि छन् । आयोजक मोरङका सत्र पालिका उल्लेख गरिएको प्रचार सामग्री सामाजिक सञ्जालहरूमा देख्न सकिन्छ ।

कार्यक्रमको स्थानीय संयोजक नेपाली कांग्रेस विराटनगर महानगर समितिका सभापति दीपक चापागाईंले कार्यक्रम नगर्न दबाब आएको तर कार्यक्रम तय भइसकेकाले नरोकिने बताए ।

“पार्टीको सुदृढीकरणका लागि नै कार्यक्रम गर्ने हो । यस्ता कार्यक्रम नगर्नू भनेर विधानले रोकेको छैन । विधानले रोक्न मिल्ने ठाउँ छैन । पार्टी संगठनकै काम हो । पार्टी र कार्यकर्तालाई जागरुक गराउने उद्देश्यका साथ पार्टीले गर्नुपर्ने काम पालिकाहरूले गरेको हो,” उनले भने ।

पूर्वानिर्धारित कार्यक्रम रोक्न कांग्रेसको केन्द्रीयस्तरका नेताबाट दबाब आएको सभापति चापागाईंले सुनाए ।

“केन्द्रीय सभापतिज्यूको कार्यक्रमलाई असर गर्ला कि भन्ने पिर हुन सक्छ । केन्द्रबाट टेलिफोन पनि आयो । तर, यो कार्यक्रमले पार्टीलाई के घाटा भएको छ र ? भनेर मैले प्रश्न सोधेँ,” चापागाईंले बाह्रखरीसँग भने ।

नेपाली कांग्रेस प्रदेश समितिले बुधबार मंसिर २१ गते पार्टी सभपाति शेरबहादुर देउवाको प्रमुख अतिथ्यमा प्रदेश भेला आयोजना गर्ने घोषणा गरेको छ । नेपाली कांग्रेसको प्रदेश समितिमा संस्थापन पक्षको बहुमत छ ।

विराटनगरस्थित कांग्रेसको प्रदेश समिति कार्यालयमा आयोजित पत्रकार सम्मेलनमा पार्टीको प्रदेश समिति सभापति उद्धव थापाले कार्यक्रमको तयारीस्वरूप आठवटा उपसमिति गठन भइसकेको जानकारी दिए ।

अर्को पक्षले पनि त्यस्तै प्रकृतिको कार्यक्रम विराटनगरमै गर्न लागेको विषयमा सोधिएको प्रश्नमा थापाले कांग्रेसको प्रदेशस्तरीय संगठनलाई क्रियाशील, सुदृढ, चलायमान र थप जिम्मेवार बनाउनका भेला आयोजना गरिएको बताए ।

“पार्टीको गतिविधि प्रदेशस्तरमा प्रदेश समितिले गर्ने हो । तर, अरू ढंगले पनि पार्टीसँग सम्बन्धित गतिविधि गर्न नपाइने भन्ने छैन,” थापाले भने ।

प्रदेशको भेलामा राजनीतिका, आर्थिक र सांगठनिक प्रतिवेदन पेस हुने र पारित भई त्यसकै कार्यदिशाअनुरूप प्रदेश समिति अघि बढ्ने उनको भनाइ थियो । प्रदेश समितिले पुस १६ राष्ट्रिय मेलमिलाप दिवसको सन्दर्भ पारेर नेपालकै होचो भाग झापाको केचनाकवलबाट सबैभन्दा अग्लो सगरमाथासम्म 'जनजागरण अभियान' सञ्चालन गर्ने घोषणा समेत गरेको छ ।

सभापति थापाले भने, “रोजगारी उद्यम, कृषि, रहनसहन आदि र पार्टी जीवनसँग जोडिएका विविध पक्षलाई अध्ययन गर्ने उद्देश्यका साथ कार्यक्रम गर्न लागिएको हो ।”

यो अभियान सोलुखुम्बुमा पुगेर समापन हुने उनले बताए । नेपाली कांग्रेस प्रदेश समितिमा महामन्त्री भुपेन्द्र राईले पार्टीको नियमिति गतिविधिको रूपमा भेला आयोजना गरिएको भन्दै जनगागरण अभियानलाई विशेष महत्त्व दिइएको बताए ।

उनले भने, “तल पार्टीका कार्यकर्ता र संगठनको अवस्था बुझ्न यो अभियान सहयोगी हुने छ ।”