काठमाडौं । अवैध पेस्तोलसहित पक्राउ परेका नेपाली सेनाका दुई सिपाहीलाई जिल्ला अदालत काठमाडांैं धरौटीमा छोड्ने आदेश गरेको छ । कार्तिक १० गते काठमाडौंको नागार्जुन नगरपालिका–१०, रानीवनबाट प्रहरी वृत्त स्वयम्भुको टोलीले दैलेखको भगवतीमाई गाउँपालिका–७ का २४ वर्षीय अनिल खड्कालाई पेस्तोलसहित पक्राउ गरेको थियो ।

उनी सेनाको श्री खड्कदल गण रामेछाप दरबन्दी भई सैनिक अस्थाई निवेस बारुदखानामा कार्यरत थिए । वृत्त स्वयम्भुको विशेष टोलीले गोप्य सूचनाका आधारमा खड्काको कोठाबाट ‘मेड इन अमेरिका’ लेखिएको पेस्तोल बरामद गरेको थियो ।

खड्कामाथि अनुसन्धान गर्दै जाँदा घटनामा खड्कदल गण रामेछापमै कार्यरत अर्का सिपाही नवलपरासीका २६ वर्षीय संघर्ष सिंह महतोको समेत संलग्नता खुलेको थियो ।

उनलाई समेत रामेछापबाट प्रहरीले काठमाडौं झिकाएको थियो । उनीहरू दुवैजनाविरुद्ध प्रहरीले हातहतियर खरखजान मुद्दा चलाएको थियो ।

प्रहरीकै प्रतिवेदनका आधारमा जिल्ला सरकारी वकिल कार्यालय काठमाडौंले हातहतियर खरखजान मुद्दामा सोमबार अदालतमा मुद्दा दर्ता गराएको थियो । बिहीबारको थुनछेक बहसपछि भने जिल्ला अदालत काठमाडौंले उनीहरू दवैजनाबाट जनही एक÷एक लाख रुपैयाँ धरौटी लिएर छोड्ने आदेश गरेको हो ।

हातहतियार मुद्दामा सेनाको गणबाट नै प्रहरीले पक्राउ गरेर अनुसन्धान गरेको यो नै पहिलो घटना हो । पक्राउ परेका दुवैजनालाई सैनिक अदालतले समेत छुट्टै कारबाही गर्नेछ ।