काठमाडौं । अमेरिकी राष्ट्रपतिमा निर्वाचित भएसँगै डोनाल्ड ट्रम्पले आफ्नो टिम बनाइरहेका छन् । उनले जनवरी २०२५ मा राष्ट्रपति पद सम्हाल्ने छन् । उनले त्यसअघि नै टिम तयार पार्न खोजिरहेका छन् । अहिलेसम्म उनले चुनावी अभियानमा सहयोग गरेकाहरूदेखि अर्बपति व्यापारीहरूसम्मलाई टिममा समावेश गरिसकेका छन् । हेरौँ, अहिलेसम्म कसले के जिम्मेवारी पाए ? 

स्टेट सचिव : म्याक्रो रबिवो

ट्रम्पले स्टेट सचिवका रूपमा म्याक्रो रुबिवोलाई छानेका छन् । ५३ वर्षीय म्याक्रो चीन, क्युबा र इरान मामिलामा जानकार मानिन्छन् । उनी अमेरिकाको उपल्लो सदन सिनेटको गुप्तचर समिति र वैदेशिक सम्बन्धका सदस्य हुन् । ट्रम्पले उनलाई राज्य सचिव नियुक्त गर्दै भनेका छन्, "उनी हाम्रो देशका लागि बलियो वकालत गर्छन्, उनी निडर योद्धा हुन् ।"

महान्यायाधिवक्ता : म्याट गेट्ज

४२ वर्षीय म्याट अमेरिकाका प्रख्यात अधिवक्ता हुन् । म्याटलाई नियुक्त गर्दै ट्रम्पले भनेका छन्, "म्याटले सरकारलाई हतियार बनाउने चलनको अन्त्य गर्छन् र उनले हाम्रा सीमा सुरक्षित राख्छन् । आपराधिक संगठन समाप्त पारेर उनले न्याय व्यवस्थाबाट गुमेको अमेरिकी जनताको विश्वास र भरोसा पुनःस्थापित गर्ने छन् ।"

अमेरिकाको तल्लो सदनका सदस्य रहेका म्याटले सांसद पदबाट राजीनामा दिएका छन् । उनीमाथि संसद्को नैतिक समितिले १७ वर्षीया बालिकासँग यौन सम्बन्ध राखेर पैसा तिरेको आरोपमा छानबिन गरिरहेको छ ।

राष्ट्रिय गुप्तचर निर्देषक : तुलसी गबार्ड

हवाई राज्यकी पूर्वप्रतिनिधि तुलसी गबार्डलाई ट्रम्पले राष्ट्रिय गुप्तचरको निर्देशक बनाएका छन् । सन् २०२० मा डेमोक्र्याटिक पार्टीबाट राष्ट्रपतिको टिकट नपाएपछि गबार्ड सन् २०२२ मा डेमोक्र्याटिक पार्टी छाडेर ट्रम्पको टिममा सामेल हुन आएकी थिइन् ।

गबार्ड पूर्वसैनिक हुन् । उनले दुई दशकसम्म सैन्य सेवामा काम गरेकी छन् । उनीसँग इराक, कुवेतमा खटिसकेको अनुभव छ ।

उनी अमेरिकी राजनीतिमा हिन्दु धर्मावलम्बीको पक्षपाती मानिन्छन् । उनकी आमाले सन् १९८३ मा हिन्दु धर्म अपनाएकी थिइन् । यही कारण उनकी आमाले उनको नाम तुलसी राखिन् । तुलसी अमेरिकी संसद्को पहिलो हिन्दु सदस्य हुन् । तुलसीको भारतको भारतीय जनता पार्टीसँग निकट सम्बन्ध छ ।

सुरक्षा सचिव : पिट हेगसेथ

४४ वर्षीय पिट फक्स न्युज च्यानलका कार्यक्रम प्रस्तोता हुन् । उनी ‘फक्स एन्ड फ्रेन्ड्स विकेन्ड’ कार्यक्रम चलाउने गर्थे । उनी फक्स टेलिभिजनमा सन् २०१४ देखि कार्यरत थिए । उनी आफ्नो कार्यक्रममा बारम्बार ट्रम्पलाई बोलाइरहन्थे । यहीबाट उनीहरूबीच मित्रता गाँसिएको हो ।

पिटले सन् २००२ देखि २०२१ सम्म अमेरिकाको आर्मीका रूपमा काम गरिसकेका छन् । उनी सन् २००५ मा इराक र २०११ मा अफगानिस्तानमा खटिएका थिए ।

गृह सुरक्षा सचिव : क्रिस्टी नोयम

क्रिस्टी नोयम आफ्ना दक्षिणपन्थी विचारका कारण अमेरिकीमाझ चर्चित छिन् । उनले दुईपटक साउथ डकोटाको प्रतिनिधित्व गरिसकेकी छन् ।

कोभिड–१९ को माहमारीको समयमा अमेरिकाका सबै राज्यले स्वास्थ्य सावधानी अपनाउँदा उनले भने साउथ डकोटलाई व्यापारका लागि खुला गरिन् । यसपछि जुलाई २०२० मा ट्रम्पले साउथ डकोटामा आतिशबाजीसहितको ठूलो ‍र्‍याली निकाले ।

उनले आफ्नो संस्मरणात्मक किताबमा कुकुरलाई गोली हानेर मारेको लेखेकी छन् । यो विषयको अहिले अमेरिकामा चर्को आलोचना भइरहेको छ । ट्रम्पले बारम्बार भन्ने गरेको गैरकानुनी आप्रवासी नियन्त्रणमा यो पद सबैभन्दा प्रभावकारी मानिन्छ ।

सीआईए निर्देशक : जोन र्‍याटक्लिफ

अमेरिकाको गुप्तचरी संस्था हो, सीआईए । जोन र्‍याटक्लिफ यसअगाडि ट्रम्पको कार्यकालका अन्तिम डेढ वर्षमा राष्ट्रिय गुप्तचरको निर्देशक थिए । अमेरिकाको आन्तरिक र बाह्य गरी दुवै गुप्तचर संस्थाको नेतृत्वमा पुग्ने जोन र्‍याटक्लिफ थोरे मान्छेमध्ये हुन् ।

स्वास्थ्य र मानवीय सेवा सचिव : रोबर्ट एफ केनडी जुनियर

रोबर्ट सुरुमा डेमोक्र्याटबाट राष्ट्रपतिय उमेदवारका लागि लडेका थिए । तर, उनी पार्टीभित्रकै प्रतिस्पर्धामा हारे । त्यसपछि स्वतन्त्र उमेदवारी घोषणा गरे तर, अन्तिममा उनले उमेदवारी फिर्ता लिएर ट्रम्पलाई सघाए ।

रोबर्ट डेमोक्र्याटिक पार्टीका ‘आइकन’ मानिने रोबर्ड केनडीका छोरा हुन् । रोबर्टले कोभिड–१९ को भ्याक्सिनबारे अनेक अफवाह फैलाएका थिए । भ्याक्सिनका बारेमा अफवाह फैलाउने मान्छे नै मानवीय र स्वास्थ्य सेवाको सचिव भएकामा अमेरिकीहरू दंग छन् ।

चिफ अफ स्टाफ : सुसी वाइल्स

६७ वर्षीय वाइल्स ट्रम्पको वरिष्ठ सल्लाहकार हुन् । उनी ट्रम्पको ‘डी–फ्याक्टो म्यानेजर’ पनि हुन् । फ्लोरिडाको राजनीतिमा सक्रिय उनले ट्रम्पको चुनावी अभियानलाई व्यवस्थापन गरेकी थिइन् ।

डिर्पाटमेन्ट अफ गर्भनमेन्ट एफिसियन्सी : एलन मस्क र विवेक रामास्वामी

एलन र विवेकलाई ट्रम्पले आफ्नो राजनीतिक एजेन्डा लागु गराउने मुख्य पद दिएका छन् । यी दुई जनालाई सरकारी कर्मचारी कटौती, कतिपय सरकारी संस्थान बन्द गर्ने अधिकार हुने छ । यसका साथै एलन र विवेकसँग अमेरिकी सरकारका अतिरिक्त नियम कानुन हटाउने, सरकारको खर्च कटौती गर्ने र संघीय सरकारका एजेन्सीहरूको पुनःगठनको पनि अधिकार हुने छ ।

ट्रम्पले ‘सेभ अमेरिका’ अभियानका लागि खर्च कटौतीलाई सबैभन्दा जरुरी काम भन्दै आएका छन् ।

ट्रम्पको राजनीतिक सपना पूरा गर्ने टिममा रहेका विवेकका बा आमा भारतको केरल राज्यबाट अमेरिका गएका हुन् । रामास्वामी भने अमेरिकामै जन्मिएका हुन् ।

एपीबाट ।