मोरङ । नेकपा (एमाले)का महासचिव शंकर पोखरेलले एमालेलाई निर्णायक राष्ट्रिय शक्ति बनाउन सबै लाग्नुपर्ने बताएका छन् ।

एमाले मोरङ जिल्ला कमिटीले आज ग्रामथान गाउँपालिकामा आयोजना गरेको कार्यकर्ता भेला एवं प्रशिक्षण कार्यक्रममा उनले ‘मिसन–८४’ मा पार्टीलाई बहुमतका साथ विजयी बनाउन आजैदेखि कार्यकर्ता संगठित भएर लाग्नुपर्ने बताए ।

महासचिव पोखरेलले एमालेको नीतिलाई राष्ट्रको नीति बनाउन आगामी निर्वाचनमा विजयी बनाउन सकेमात्र मुलुकमा विकासले गति लिने दाबी गरे ।

कार्यक्रममा कोसी प्रदेशका मुख्यमन्त्री हिक्मतकुमार कार्कीले एमालेको लोकप्रियताकै कारण विगतको उपनिर्वाचनमा पार्टीका उमेदवारले पूर्वको इलाम र पश्चिममा समेत विजयी भएको बताए । उनले वर्तमान संघीय लोकतान्त्रिक शासन व्यवस्थाको विकल्प नभएकाले यसलाई संस्थागत गर्न सबैको सहयोग आवश्यक रहेको बताए ।

एमाले कोसी प्रदेश इन्चार्ज शेरधन राई र प्रदेश अध्यक्ष घनश्याम खतिवडाले पार्टीले तय गरेको राष्ट्रिय लक्ष्य र संकल्पलाई केन्द्रविन्दुमा राखी सिंगो पार्टी शक्तिलाई परिचालन गर्नुपर्नेमा जोड दिए ।

पार्टीका मोरङ इन्चार्ज जीवन घिमिरे, मोरङ अध्यक्ष बाबुराम कार्कीले मिसन ८४ लाई सफल बनाउन नेता कार्यकर्तालाई महत्त्वपूर्ण भूमिका निर्वाह गर्न आग्रह गरे ।

सोही अवसरमा मंसिर १६ गते हुने ग्रामथान गाउँपालिकाको अध्यक्ष पदको निर्वाचनमा एमालेका तर्फबाट अध्यक्षका उमेदवार तुलसीराम विश्वासलाई घोषणा गरिएको थियो । रासस