काठमाडौं । तेस्रो तथा निर्णायक खेलमा अस्ट्रेलियालाई आठ विकेटले हराउँदै पाकिस्तानले तीन खेलको एकदिवसीय शृंखला २–१ ले जितेको छ । 

शृंखलाको पहिलो खेलमा पाकिस्तान पराजित भएको थियो । त्यसपछिका दुई खेलमा लगातार जित निकाल्दै पाकिस्तानले अस्ट्रेलियालाई उसैको घरमा निराश बनाएको हो ।

आइतबार भएको अन्तिम खेलमा अस्ट्रेलियाले प्रस्तुत गरेको १४१ रनको सामान्य लक्ष्य पाकिस्तानले २६.५ ओभरमा दुई विकेट गुमाएर भेट्टायो । 

पाकिस्तानको जितमा ओपनर सैम अयुबले ४२ रन बनाए । उनले पहिलो विकेटका निम्ति अब्दुल्लाह सफिकसँग ८४ रनको साझेदारी गर्दै पाकिस्तानलाई जितनजिक पुर्‍याएका थिए । सफिकले ३७ रन थपे ।

अविजित रहेको कप्तान मोहम्मद रिजवानले ३० र बाबर आजमले २८ रन जोडे । 

अस्ट्रेलियाका लेन्स मोरिसले दुई विकेट लिए । 

त्यसअघि, टस हारेर ब्याटिङमा उत्रिएको अस्ट्रेलियाले ३१.५ ओभरमा सबै विकेट गुमाएर १४० रन बनाएको थियो ।

अस्ट्रेलियाका सिन अबोटले ३० रन बनाए । ओपनर म्याथ्यु सर्टले २२, एडम जाम्पाले १३ रन जोडे ।

अस्ट्रेलियालाई सस्तैमा समेट्न साहिन साह अफ्रिदी र नसिम साहले समान तीन विकेट लिए । ह्यारिस रौफले दुई र मोहम्मद हसनैनले एक विकेट हात पारे ।

शृंखलाको पहिलो खेलमा पाकिस्तान दुई विकेटले पराजित भएको थियो । दोस्रो खेलमा पाकिस्तानले नौ विकेटको सहज जित निकालेको थियो ।