काठमाडौं । नेपाली कवितामा तरलवादको वकालत गर्ने कविहरूमध्येका एक विनय रावलद्वारा रचना गरिएका चार पुस्तकको समग्र कृति विनय–ग्रन्थ एक समारोहबीच सार्वजनिक भएको छ ।

काठमाडौंमा शनिबार भूगोल साहित्य समाज र विनय रावल स्मृति प्रतिष्ठानको संयुक्त आयोजनामा सम्पन्न कार्यक्रममा प्रमुख अतिथि ज्ञानुवाकर पौडेल, डा. तुलसी भट्टराई, विनय पत्नी सुलोचना रावलले ग्रन्थ लोकार्पण गरे ।

विनयका अनन्य मित्र ज्ञानुवाकर पौडेलले संसारमा कालजयी कोही नहुने भन्दै आफ्ना तीन मित्र विनय, जगदीश घिमिरे र मनु ब्राजाकीको निधनले आफूलाई अत्यधिक पीडा दिएको बताए । केही भावुक हुँदै उनले विनयले थोरै किताब लेखे पनि स्थापित र चर्चित भएको उल्लेख गरे । उनले कवि रावलको स्मृतिमा कविता वाचन गरे ।

ग्रन्थका सम्पादक तथा संयोजक डा. तुलसी भट्टराईले विनय विद्रोही कवि भएको भन्दै उनी विचारक पनि भएको उल्लेख गरे ।

अर्का वक्ता ध्रुव मधिकर्मीले विनय रावलसँगको सम्बन्धका बारेमा चर्चा गरे ।

उक्त अवसरमा विनय रावलका दाजुभाइ विमल रावल र बरुण रावलसँगै विनोद नेपाल, जयबहादुर चन्द, उद्धव खनाल, दिनेशविक्रम थापाले विनयको काव्यकारिता, उनको विद्रोही चेत र राजनीतिक दृष्टिकोणबारे बोलेका थिए ।

पंचायतकालमा अतुलेशको नामबाट राष्ट्रपुकार साप्ताहिकमा विचार विश्लेषण लेख्ने कवि रावलको साझा प्रकाशनको सदस्य हुँदा २०६२ जेठमा दार्जलिङ भ्रमणमा जाँदा दुर्घटनामा निधन भएको थियो ।