काठमाडौं । यो वर्षको दसैँको फूलपातीमा रिलिज भएका चलचित्रले आकर्षक ग्रसकलेक्सन गरेका छन् । फूलपातीमा रिलिज भएका चलचित्र ‘छक्का पञ्जा–५’, ‘१२ गाउँ’ र ‘ज्वाइँ साब’ले ठूलो परिणाममा ग्रसकलेक्सन गरेका हुन् । 

यी तीन चलचित्रले करिब साढे ४८ करोडको हराहारीमा कलेक्सन गरेका छन् । बिराज भट्टका अनुसार ‘१२ गाउँ’ले सबैभन्दा धेरै साढे २३ करोड ग्रसकलेक्सन गरेको छ । 

• ‘१२ गाउँ’ले तीन हप्तामा कति गर्‍यो ग्रसकलेक्सन ? 

‘छक्का पञ्जा–५’ले २० करोडभन्दा माथि र ‘ज्वाइँ साब’ले तीन हप्तामा पाँच करोड कलेक्सन गरेको छ । 

यी तीन सिनेमाको तीन हप्तामा जम्मा कलेक्सन साढे ४८ करोड गरेका छन् । तर, यी तीनमध्ये ‘ज्वाइँ साब’ उत्रिए पनि बाँकी दुई चलचित्र भने अहिले पनि हलमा प्रदर्शनरत छन् । त्यसैले लाइफटाइम ग्रसकलेक्सन भने आधा अर्बको हाराहारीमा पुग्ने देखिन्छ । 

यो ग्रसकलेक्सन हलबाट उठेको रकम मात्रै हो । इन्टरनेसनल राइट्स र डिजिटल राइट्स यो बाहेक छुट्टै छ ।  

‘छक्का पञ्जा’टिमले आधिकारिक रूपमा कलेक्सनको तथ्यांक सार्वजनिक नगरे पनि आफ्ना यसअघिको सिनेमाको रेञ्जमा पुगिसकेको बताएको छ । “छक्का पञ्जाका सिरिजको सबैभन्दा धेरै कलेक्सनको रेञ्जमा पुगिसकेको छ,” दीपकराज गिरीले बाह्रखरीसँग भनेका छन् । 

‘छक्का पञ्जा–४’ले २० करोड कलेक्सन गरेको थियो । त्यसैले दीपकको भनाइले ‘छक्का पञ्जा–५’ले २० करोड ग्रसकलेक्सन गरिसकेको संकेत गर्छ । 

• ‘छक्का पञ्जा–५’ले तीन हप्तामा कति गर्‍यो कलेक्सन ? ग्रसकलेक्सनबारे के भन्छन् दीपक ?

‘ज्वाइँ साब’का निर्देशक वसन्त निरौला आफ्नो चलचित्रले पाँच करोडभन्दा माथि ग्रसकलेक्सन गरेको बताउँछन् । “ज्वाइँ साबले सवा पाँच करोडको हाराहारीमा ग्रसकलेक्सन गरेको छ,” निर्देशक वसन्तले भने । 

वितरक अशोक शर्मा यो दसैँमा नेपाली सिनेमाले इतिहासकै सबैभन्दा धेरै ग्रसकलेक्सन गरेको बताउँछन् । दसैँमा यसअघि कुनै पनि वर्ष नेपाली चलचित्रले यति धेरै कलेक्सन नगरेको उनको भनाइ छ । 

बक्सअफिस रिपोर्ट भनेर वितरक र निर्माताले दाबी गर्दै आफ्नो चलचित्रको कलेक्सन रकम सार्वजनिक गर्दै आएका छन् । तर, चलचित्र विकास बोर्डले भने बक्सअफिस रिपोर्ट सार्वजनिक गरेको छैन । त्यसैले निर्माता र वितरकले गर्ने ग्रसकलेक्सनको दाबीमा भने स्वयं चलचित्रकर्मीहरूले प्रश्न चिह्न उठाउँदै आएका छन् । 

‘ज्वाइँ साब’मा जितु नेपाल, नीति शाह, बुद्धि तामाङ, हिमेश पन्तलगायत मुख्य भूमिकामा छन् । 

‘छक्का पञ्जा–५’ दीपाश्री निरौलाले निर्देश गरेको चलचित्र हो । यसमा दीपकराज गिरी, केदार घिमिरे, वर्षा शिवाकोटी, प्रकाश घिमिरे, निर्मल शर्मालगायत कलाकार मुख्य भूमिकामा छन् । 

‘१२ गाउँ’लाई बिराज भट्टले निर्देशन गरेका छन् । बिराज स्वयं र समीर भट्ट यो चलचित्रको मुख्य भूमिकामा छन् ।