काठमाडौं । ललितपुरको मेडिसिटी अस्पतालको लापरबाहीका कारण बिरामीको ज्यान गएको भन्दै पाँच करोड क्षतिपूर्तिसहित कारबाहीको माग गरिएको छ ।
काठमाडौंको वनस्थलीका प्रताप रिमालले अस्पतालको चरम लापरबाहीका कारण ६२ वर्षीय बुवा ज्ञानप्रसाद रिमालको मृत्यु भएको भन्दै अस्पताल र उपचारमा लापरबाही गर्ने चिकित्सकलाई कारबाहीको माग गरेका हुन् ।
अस्पताल र चिकित्सकले उपचारमा भएको गम्भीर लापरबाही र गल्ती ढाकछोपका लागि गम्भीर झुट बोलेको उनको अरोप छ । घटनाबारे रिमालले जिल्ला अदालत ललितपुरमा मुद्दासमेत दायर गरेका छन् ।
बिहीबार पत्रकार सम्मेलन गर्दै उनले घटनाको फेहरिस्त यसरी सुनाए :
“मेरो बुवा मिर्गौला रोगको बिरामी हुनुहुन्थ्यो । डेढ महिनादेखि सातामा तीन दिन हेमाडायलाइसिस गराइ राख्नुभएको थियो । भदौ ३१ गते साँझ एक्कासि घरमै रिंगटा लाग्ने र श्वास फेर्न गाह्रो हुने भएपछि हामीले उहाँलाई मेडिसिटी अस्पतालको इमर्जेन्सीमा पुर्यायौँ ।
अस्पतालबाट वहाँलाई युरिया लेभल एकदमै धेरै (२०७) भएर गाह्रो भएको भनियो । सोही दिन उहाँको डायलाइसिस गर्ने दिन पनि थियो । डायलाइसिस गर्दागर्दै उहाँलाई असहज भएपछि आईसीयूमा राखेर मनिटरिङ गर्न भनी भर्ना गरियो ।
दोस्रो दिन बुवाको ईसीजी गरियो, त्यसमा केही परिवर्तन देखिएको भन्दै एन्जियोग्राम गरियो । एन्जियोग्राम पनि सफल भयो र एक दिन मोनिटरका लागि आईसीयूमै राख्ने भनियो । मेडिसिटी अस्पतालमा आईसीयुमा राख्दा बिरामी कुरुवा बस्न नपाउने रहेछ । त्यसैले, हामीलाई पनि घर जान आग्रह गरियो, हामी बाध्यतावश घर फर्कियौँ ।
बुवालाई राति गाह्रो भएछ । एन्जिओग्राम गरिएको ठाउँ सुन्निने र पानीको फोकाजस्तो देखिएछ, बुवालाई खप्नै नसक्ने गरी पीडा भएछ । बुबाले परिवारलाई बोलाइदेऊ, मलाई गाह्रो भयो भन्दा पनि अस्पतालले हामीलाई रातभर कुनै खबर गरेन ।
त्यतिमात्रै होइन, त्यसको सही उपचार पनि गरेनछ र रातभर दुखाइ कम गर्ने फेन्टायल मात्र खुवाएर राखेछ । जुन कुरा नर्सिङ नोटमा स्पस्ट लेखिएको छ ।
भोलिपल्ट हामी अस्पताल पुग्दा बुवाको अवस्था जटिल भइसकेको थियो । बुवाको हातको अपरेसन गर्नुपर्ने अवस्थामा पुगिसकेको थियो । अपरेसन नै अन्तिम विकल्प भएपछि हामीले केही गर्न सकेनौँ । जब अपरेसन गरियो, त्यसपछि बुबाको स्वास्थ्यमा सुधार हुन सकेन र अन्ततः हामीले बुवालाई असोज ४ गते सदाका लागि बिदा गर्नुपर्यो ।
बुबाको उपचारमा मेडिसिटीले चरम लापरबाही गरेकाले आफूहरू अस्पतालविरुद्ध कानूनी उपचारमा गएको प्रतापको भनाइ छ । “आईसीयूमा रहेको बिरामीलाई लापरबाही गर्ने र आफ्नो गल्ती ढाकछोप गर्न झुट बोल्ने अस्पतालविरुद्ध हामी अहिले अदालती प्रक्रियामा गएका छौँ,” उनले भने ।
ललितपुर जिल्ला अदालत र नेपाल मेडिकल काउन्सिलमा उपचारमा संलग्न डाक्टरलाई कारबाही गरी पीडित पक्षलाई पाँच करोड क्षतिपूर्ति उपलब्ध गराउने मागसहित मुद्दा दर्ता गराएको उनले जानकारी दिए ।
घटना दबाउनका लागि मेडिसिटी अस्पताल लागिपरेको पनि उनको दाबी छ । प्रतापले जारी गरेको विज्ञप्तिमा भनिएको छ, "घटना साम्य पार्नकै लागि अस्पतालले बुवाको उपचारको क्रममा भएको ८ लाख रुपैयाँ पनि फिर्ता गरिसकेको छ । तर, अस्पतालले गरेको गल्ती र गल्ती ढाकछोप गर्न हामीमाथि बोलेको धावाविरुद्ध हामी जस्तोसुकै परिस्थिति पनि लडाइँ लड्ने अठोट लिएका छौँ ।"
प्रकाशित मिति: बिहीबार, कात्तिक ८, २०८१ १४:३२
-1716278128.jpg)
-1734691541.jpg)
-1734839313.jpg)
