काठमाडौं । सिनामंगलस्थित काठमाडौं मेडिकल कलेज (केएमसी) शिक्षण अस्पतालमा २२औँ ब्याचका झन्डै ९० जना विद्यार्थी ६ दिनदेखि आन्दोलनमा छन् । ओपीडी कक्ष अगाडि नै धर्नामा बसेका उनीहरूको माग छ– पाँचवर्षे स्नातक तह अध्ययनका क्रममा कलेजले लिएको अतिरिक्त शुल्क फिर्ता हुनुपर्छ ।

तर, ६ दिनदेखि ड्युटी ठप्प पारेर धर्नामा बस्दा कलेज प्रशासनले आफ्ना माग सम्बोधन नगरेको बरु आफूहरूमाथि बल प्रयोग गरेको विद्यार्थीको आरोप छ । चिकित्सा शिक्षा संघर्ष अभियान र प्राइभेट मेडिकल कलेजबीच २०७६ र २०७८ सालमा भएको कुनै अतिरिक्त शुल्क नलिने र लिएका शुल्कहरू फिर्ता गर्ने सहमति कार्यान्वयन हुनुपर्ने माग उनीहरूको छ  ।

९० विद्यार्थीबाट झन्डै चार करोड अतिरिक्त शुल्क असुली, कुन शीर्षकमा कति ?

चिकित्सा शिक्षा आयोगले तोकेको बाहेक केएमसीले ९० जना विद्यार्थीबाट तीन करोड ७१ लाख ७८ हजार ४०० रुपैयाँ अतिरिक्त शुल्क असुलेको विद्यार्थीको दाबी छ । जसमा २२औँ ब्याचका ५० नेपाली र स्वदेशी र विदेशी गरी उनीहरूले सो शुल्क पाँचवर्षे स्नातक अध्ययनको क्रममा विभिन्न शीर्षकमा तिरेको बताएका छन् ।

आन्दोलनको नेतृत्व गरिरहेका विद्यार्थी हृदयराज संग्रौलाका अनुसार, हाल स्नातक अध्ययन सकेर इन्टर्नसिपमा रहेका उनीहरूले इन्टर्नसिपबापत मात्रै दुईलाख रुपैयाँ कलेजलाई बुझाएका छन् । यस्तै, कलेजले आन्तरिक परीक्षाका निम्ति एकलाख ८० हजार, विश्वविद्यालय रजिस्ट्रेसन शुल्कबापत १५ हजार, कम्युनिटी फिल्ड भिजिटका निम्ति ९० हजार र मेडिकल काउन्सिलमा रजिस्ट्रेसनबापत पाँच हजार गरी प्रतिव्यक्ति चार लाख ९० हजार रुपैयाँ अतिरिक्त शुल्क लिएको लिएको उनीहरूको दाबी छ ।

पचास नेपाली विदार्थीबाट चारलाख ९० हजारका दरले दुई करोड ४५ लाख र ४० विदेशी विद्यार्थीबाट प्रतिव्यक्ति तीन लाख १६ हजार ९६० का दरले एक करोड ३६ लाख ७८ हजार ४०० रुपैयाँ शुल्क लिएको रेकर्ड छ । यसरी नेपाली र विदेशी विद्यार्थी गरी पाँच वर्षमा तीन करोड ७१ लाख ७८हजार ४०० रुपैयाँ बढी शुल्क लिएको विद्यार्थीको दाबी छ ।

एक नेपाली विद्यार्थीले पाँच वर्षमा होस्टेलको शुल्कसहित ५१ लाख २५ हजार रुपैयाँ तिरेको बिल उनीहरूले पेस गरेका छन् ।

एमबीबीएस तह अध्ययनका निम्ति चिकित्सा शिक्षा आयोगले उपत्यकाभित्र ४१ लाख ६८ हजार र उपत्यकाबाहिर ४५ लाख ९५ हजार रुपैयाँ शैक्षिक शुल्क तोकेको छ ।

राष्ट्रिय चिकित्सा शिक्षा ऐनको दफा २ (थ) मा शिक्षण संस्थाले चिकित्साा शिक्षाको अध्ययन अवधिभर लिने शिक्षण शुल्कले भर्ना, शिक्षण शुल्क, ल्याब, पुस्तकालय, सामुदायिक तालिम वा परीक्षा शुल्कलाई समेट्ने उल्लेख छ ।

यसैभित्र फिल्ड भिजिट, विश्विद्यालय रजिस्ट्रेसन, इन्टर्नसिप, फरेन्सिक पोस्टिङ, आवेदन शुल्क र सम्बन्धन शुल्क पनि पर्ने भएकाले शिक्षण शुल्कबाहेक अन्य कुनै शीर्षकमा अतिरिक्त शुल्क लिन नपाइने आयोगले पटकपटक स्पष्ट पारेको छ ।

काउन्सिलको रजिस्ट्रेसन शुल्क विद्यार्थी आफैँले बुझाउन पाउने, होस्टेल, मेस लगायतको व्यवस्था विद्यार्थीको ऐच्छिक हुने ऐनमा उल्लेख छ ।

तर, २२औँ ब्याचका विद्यार्थीले होस्टेल र सम्बन्धन समेतको शीर्षकमा गरी ५१ लाख २५ हजार रुपैयाँ प्रतिव्यक्ति तिरेको विवरण पेस गरेका छन् । त्यसमध्ये आयोगले तोकेका बाहेक अन्य शीर्षकमा लिएको चार लाख ९० हजार रुपैयाँ प्रतिव्यक्ति फिर्ता गर्नुपर्ने विद्यार्थीको माग छ ।

एक वर्षका निम्ति भदौदेखि इन्टर्नसिप सुरु गरेका विद्यार्थीले कात्तिकदेखि ड्युटीसमेत छाडेका छन् । आफूले शान्तिपूर्ण ढंगले माग राखिरहँदा कलेजले गुन्डा लगाएर धरपकड गर्न खोजेको आन्दोलनरत विद्यार्थीको अरोप छ ।

“यसअघि पटकपटक शुल्क फिर्ता गर्ने सहमति भएको छ । तर, कार्यान्वयन भएको छैन । हामीलाई मासिक १० हजारका दरले दिन्छौँ । यति वा उति भन्दै प्रशासनले पटकपटक बार्गेनिङ गरिरहेको छ, हामी आफ्नो माग पूरा नहुन्जेल आन्दोलनमै रहन्छौँ,” संयोजक संग्रौलाले भने ।

यता कलेज प्रशासनले भने विद्यार्थीका माग केही दिनभित्रै सम्बोधन गर्ने गरी प्रक्रिया अघि बढाएको दाबी गरेको छ । केएमसीका व्यवस्थापक नारायण दाहालले विद्यार्थीका माग वार्तापछिको आपसी सहमतिबाट छिट्टै सम्बोधन गरिने जानकारी दिए ।