काठमाडौं । एभरेष्ट बैंकले ३० औं वार्षिकोत्सवको अवसारमा काठमाडौं इन्स्टिच्युट अफ चाइल्ड हेल्थ अस्पताललाई भवन निर्माण कार्यका लागि एक करोड रुपैयाँको आर्थिक सहयोग गरेको छ । 

उक्त चेक एभरेष्ट बैंकका संचालक समितिका अध्यक्ष बालगोपाल बैद्य र प्रमुख कार्यकारी अधिकृत सुदेश खालिङले संयुक्त रूपमा अस्पतालका अध्यक्ष प्रा.डा. भगवान कोइरालालाई हस्तान्तरण गरेका हुन् । यस सहयोगबाट अस्पताल निर्माणमा थप टेवा पुग्ने र बालबालिकाले सुलभ तथा गुणस्तरीय स्वास्थ सेवा प्राप्त गर्ने बैंकले विश्वास लिएको छ ।

बैंकले ३० औं वार्षिकोत्सवको अवसरमा प्रधान कार्यालय, लाजिम्पाटमा रक्तदान तथा बैंकमा लामो समयसम्म सेवा गर्ने कर्मचारीलाई दीर्घ सेवापदक तथा कदरपत्र वितरण गरिएको छ ।

बैंकले सामाजिक उत्तरदायित्वअन्तर्गत विभिन्न कार्यक्रम घोषणा समेत गरेको छ । बैंकले संस्थागत सामाजिक उत्तरदायित्वअन्तर्गत शिक्षा, स्वास्थ्य, दैवी प्रकोप, वातावरण संरक्षण, संस्कृति पर्द्धनलगायत क्षेत्रमा सहयोग तथा परोपकारी कार्य गर्दै आइरहेको छ ।

३० औं वार्षिकोत्सवको अवसरमा सामाजिक उत्तरदायित्वअन्तर्गत नै बैंकले नेपाल रेडक्रस सोसाइटी, बागबजार काठमाडौंकोे सहकार्यमा रक्तदान कार्यक्रम गरेको थियो । उक्त कार्यक्रममा बैंकका कुल ४८ जना कर्मचारीले रक्तदान गरेका छन् ।

हाल एभरेष्ट बैंकले देशभर १२९ शाखा कार्यालय, तीन एक्सटेन्सन काउन्टर, सात प्रादेशिक कार्यालय र १६७ एटीएममार्फत सेवा दिँदै आएको छ ।