काठमाडौं । सिटिजन्स क्यापिटल लिमिटेड योजना व्यवस्थापक रहेको ‘सिटिजन्स सदाबहार योजना’ खुलामुखी म्युचुअल फन्डमा शुक्रबारदेखि आवेदन खुला भएको छ । यो इकाइमा असार १३ गते (शुक्रबार) देखि १७ गतेसम्म बैंकिङ समयसम्म योजनाको इकाई निष्कासन खुला रहने छ । यो अवधिसम्म सम्पूर्ण इकाई बिक्री नभए असार २७ गतेसम्म इकाई बिक्री खुला रहने बताइएको छ । 

सिटिजन्स बैंक इन्टरनेसनल लिमिटेड कोष प्रवर्द्धक रहेको छ । नेपाल धितोपत्र बोर्डले ५० करोडको सिस्टमेटिक इन्भेष्टमेन्ट प्लान (एसआईपी) समेत गर्न सकिने सिटिजन्स सदाबहार योजना सञ्चालन अनुमति दिएको हो । 

सिटिजन्स सदाबहार योजना खरिद गर्नका लागि आफ्नो मेरो सेयर खातामार्फत वा नेपाल धितोपत्र बोर्डबाट स्वीकृत प्राप्त गरेको सी–आस्वा सदस्य बैंक तथा वित्तीय संस्था र तिनका तोकिएको शाखा कार्यालमार्फत आवेदन दिन सकिनेछ । 

यस योजनामा सहभागी हुनका लागि न्यूनतम १०० देखि अधिकतम पाँच लाख इकाई खरिद आवेदन दिन सकिनेछ । साथै, यस योजनाको प्रथम चरणमा निष्कासित इकाई बाँडफाँटपश्चात् नियमक निकायहरूको नियमानुसार तथा स्वीकृति लिइ सिस्टमेटिक इन्भेष्टमेन्ट प्लान (एसआईपी) मार्फत थप इकाईहरू निष्कासनको व्यवस्था समेत मिलाइने बताइएको छ । 

सिटिजन्स म्युचुअल फन्डअन्तर्गत सञ्चालित अन्य योजनामध्ये प्रतिइकाई अंकित मूल्य १० रुपैयाँ दरका आठ करोड २० लाख इकाई रहेको सिटिजन्स म्युचुअल फन्ड १ नामक सात वर्षे बन्दमुखी योजना परिपक्व भएको छ । अन्तिम प्रतिइकाई खुद सम्पत्ति मूल्य ११ रुपैयाँ ३० पैसामा प्रचलित कानुनबमोजिम करकट्टी समायोजन गरी इकाई धनीहरूको हितग्राही खातामा अद्यावधिक भएको बैंक खातामा जेठ २७ गतेबाट पठाउन थालेको छ । 

सिटिजन्स म्युचुअल फन्ड १ को अवधिभरमा पुँजीगत लाभ तथा विगतका आर्थिक वर्षहरूमा वितरण गरिएको प्रतिफल समेत प्रतिइकाई लगानीको औसत वार्षिक प्रतिफल १२ प्रतिशत रहेको बताइएको छ ।