खुसीको कुरा हो बीपी राजमार्ग यति छिटै यातायात सञ्चालन हुनेगरी मर्मत गरियो । असोजको दोस्रो साताको अतिवृष्टिका कारण क्षतविक्षत राजमार्ग दसैंकै बेलामा पनि मर्मतसम्भार गरिएकाले सोमबार साँझबाट त नियमित यातायात सञ्चालन गर्न दिइने भएको छ । 

सरकारी अधिकारीहरूले नै बीपी राजमार्गको क्षतिको आकलन गरेपछि छिटै सञ्चालनमा नआउने जनाउ दिएका थिए । विपत्तिको सुरुमा अकर्मण्य रहेको आरोप लागेको संघीय सरकार पनि हतास मनःस्थितिमा देखिएको थियो । लाग्थ्यो, पुनर्निर्माणमा त सरकारको ध्यानै दिन सक्दैन ।

सडक डिभिजन भक्तपुरका अनुसार आवश्यक सुधारपछि सवारीसाधन सञ्चालन गर्न दिन लागिए पनि सडक जोखिमपूर्ण छ । सुक्खा पहिरो झर्ने डर रहेकोले राति यात्रा नगर्न सडक डिभिजनले सूचना प्रकाशित गरी अनुरोध गरेको छ । यसैले त्यस सडकबाट यात्रा गर्दा बढी नै यात्रु र सवारी चालक बढी नै सावधान हुनुपर्छ । यस्तै, त्यहाँ नियामक निकायबाट पनि यात्रुको सुरक्षामा थप ध्यान दिनु जरुरी हुन्छ । 

यसपटक जनताको खप्की खाएको राजनीतिक नेतृत्व र प्रशासन संयन्त्रले भत्केका राजमार्गहरूमा यातायात सञ्चालन गराउनुलाई चुनौतीकै रूपमा लिएको देखियो । अरू राजमार्गमा पनि ट्राफिक व्यवस्थापनमा धेरै गुनासो सुनिएन भने काठमाडौंबाट पश्चिम निस्कने नाकाका रूपमा वैकल्पिक सडकको प्रयोग पनि गराइयो ।

राजमार्गहरूको अस्थायी मर्मत र यातायात व्यवस्थापनका लागि सम्बन्धित सरकारी अधिकारी र मूलतः प्राविधिकहरू धन्यवादका पात्र बनेका छन् । हुनत, तिनको कर्तव्य नै हो तैपनि उनीहरूले दसैं मनाउन लागि दिएका भए न सडकका अस्थायीरूपमै खोलिने थियो ।

सरकारले सडक मर्मत र यातायात व्यवस्थापनमा खटिएका प्राविधिकलगायत कर्मचारीहरूलाई यस क्रियाशीलताका निम्ति यथोचित पुरस्कृत गर्नुपर्छ । भविष्यमा यस्तै अवस्था आइलाग्यो भने कम्तीमा अरू कर्मचारी पनि रातदिन नभनी काममा समर्पित हुन प्रेरित होउन् । 

यसपटकको सफलता राजनीतिक नेतृत्व र प्रशासनिक संयन्त्रले साँच्चै नै चाहने हो भने असम्भवः देखिने काम पनि गर्नसक्ने क्षमता नेपालको सरकारी संयन्त्रमा रहेको उदाहरण हुनपुगेको छ । यसैले आउँदा दिनहरूमा यो सफलता चुनौती पनि बन्नेछ । अब त्यत्तिकै समयमा अहिले जति काम नगरे  नियत र  लगनमा प्रश्न  उठ्नेछ ।