काठमाडौं । अमेरिकी राष्ट्रपति पदका उमेदवार डोनाल्ड ट्रम्पको र्‍यालीनजिकै दुई बन्दुक र नक्कली राहदानीसहित एक व्यक्ति पक्राउ परेका छन् । शनिबार क्यालिफोर्नियाको कोचेलामा ट्रम्पको र्‍यालीनजिकै ती व्यक्तिलाई पक्राउ गरिएको हो ।

ती व्यक्तिका साथबाट एउटा सटगन र लोड गरिएको ह्यान्डगन र नक्कली राहदानी बरामद गरिएको प्रहरीले जनाएको छ । ४९ वर्षीय वेम मिलरलाई पक्राउ गरिएको हो ।

कालो रङको एसयूभी कार चलाउँदै गर्दा सुरक्षाकर्मीले उनलाई सुरक्षा जाँचचौकीनजिकै रोकेका थिए ।

रिभरसाइड काउन्टी प्रहरी कार्यालयले मिलरलाई हिरासतमा लिइएको जनाएको छ । गोली भरिएको बन्दुक र उच्च क्षमताको गोलाबारुद राखेको मिलरमाथि आरोप लगाइएको छ ।

अमेरिकी गुप्तचर सेवाले ट्रम्पको सुरक्षामा कुनै खतरा नरहेको जनाएको छ । स्थानीय प्रहरीले पक्राउ परेका आरोपित ‘मानसिक रूपमा असन्तुलित’ रहेको जनाएको ।

प्रहरी कार्यालयका अनुसार, यो घटनाले ट्रम्पको सुरक्षा वा र्‍यालीमा उनको उपस्थितिमा कुनै फरक परेको छैन । बीबीसीबाट ।