काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले संशोधनका नाममा संविधान खारेज गर्ने प्रयन्त भइरहेको बताएका छन् ।

बुधबार काठमाडौंमा सम्पादकहरूसँगको छलफलका क्रममा प्रचण्डले केहीलाई संविधानको उपलब्धि र परिवर्तन मन नपरेको भन्दै संविधान खारेज गर्ने प्रयन्त भइरहेको बताए । आफू नेतृत्वको सरकार परिवर्तन गरेर नयाँ सरकार बनाउनुको उदेश्य संविधान संशोधन नै हो भन्ने आफूलाई नलागेको उनको भनाइ थियो ।

आफूहरू संविधान संशोधन, परिमार्जनको विरोधी नभएको भन्दै प्रचण्डले परिवर्तनविरुद्ध हुने संशोधन भने स्वीकार्य नभएको स्पष्ट पारे । देश निकै अप्ठेरो अवस्थामा रहेकाले राष्ट्रिय सहमतिको साथ अघि बढ्नुपर्ने धारणा राखे ।

प्रचण्डले बेइमानीपूर्वक आफ्नो सरकार ढालेर पहिलो र दोस्रो दल मिलेर सरकार बनाइएको टिप्पणी गरे । सहकारी छानबिन समितिको प्रतिवेदन आइसकेको अवस्थामा त्यसलाई कार्यान्वयन गर्ने जिम्मेवारी सरकारको भएको भन्दै उनले सरकारले कार्यान्वयन गर्न नचाहेको जिकिर गरे ।

अध्यक्ष प्रचण्डले यसअघि गठबन्धनमार्फत चुनाव लड्दा माओवादीको अस्तित्व नै हराउने देखिएकाले अब एक्लै चुनाव लड्ने गरी तयारी गरिरहेको धारणा राखे ।