काठमाडौं । धितोपत्र दोस्रो बजार मापक नेप्से परिसूचक मंगलबार २७.३९ अंकले घटेर बन्द भएको छ । सोमबारको तुलनामा नेप्से परिसूचक १.०१ प्रतिशतले घटेर २६६३.३२ विन्दुमा बन्द भएको हो ।

यस दिन कारोबार रकममा पनि कमी आएको छ । चार अर्ब ५९ करोड ३७ लाख रुपैयाँको सेयर कारोबार भएको छ । सोमबार सात अर्बभन्दा बढीको सेयर कारोबार भएको थियो. ।

कारोबारमा आएका १३ समूहगत परिसूचकमध्ये म्युचुअल फन्ड समूहको परिसूचक स्थिर छ । बाँकी सबै समूहको परिसूचक घटेको छ । फाइनान्स समूहको परिसूचक सर्वाधिक २.७६ प्रतिशतले घटेको नेपाल स्टक एक्सचेन्ज (नेप्से)ले जनाएको छ ।

३५ कम्पनीको सेयर मूल्य बढेको छ । २०७ कम्पनीको सेयर मूल्य घटेको छ । डेल्टी पावर कम्पनी र आशा लघुवित्त वित्तीय संस्थाको सेयर मूल्य स्थिर छ ।

मिड सोलु हाइड्रोपावर लिमिटेडको सेयर मूल्य १० प्रतिशतले बढेको छ । यो कम्पनीको सेयर मूल्य प्रतिकित्ता ९४ रुपैयाँ ३० पैसा बढेर एक हजार ३७ रुपैयाँ ३० पैसा कायम भएको छ ।

इस्टर्न हाइड्रोपावरको सेयर मूल्य ८.५० प्रतिशतले घटेको छ । यो कम्पनीको सेयर मूल्य प्रतिकित्ता ८२१ रुपैयाँ कायम छ ।