काठमाडौं । दीपकराज गिरी, दीपाश्री निरौलाको चलचित्र ‘छक्का पञ्जा–५’ यही असोज २४ गते फूलपातीका दिन रिलिज गरिँदै छ । सोही दिन अरू दुई सिनेमा रिलिज हुँदै छन् । बिराज भट्टको ‘१२ गाउँ’ र जितु नेपालको ‘ज्वाइँ साब’ले ‘छक्का पञ्जा–५’ को सामना गर्दै छन् । सँगै रिलिज हुँदै गरेका अरू चलचित्रपक्षले ‘छक्का पञ्जा’को ‘म्याटर’मा घुसेर नकारात्मक टीकाटिप्पणी गरिरहेको कलाकार तथा निर्माता दीपक बताउँछन् ।

‘छक्का पञ्जा–५’ को कन्टेनको प्रतिक्रिया कस्तो आइरहेको छ ? 
अहिलेसम्म आएका कन्टेन मात्र होइन, चलचित्रको नराम्रो प्रतिक्रियाका लागि पनि हामी तयार छौँ । नेपाली चलचित्र उद्योगमा नराम्रो विकृति भित्रियो । ५० जनाले मिलेर रातोलाई कालो कालो भन्ने हो भने कालै हो कि क्या हो भन्ने हुन्छ ।

विगतमा पनि हाम्रो ट्रेलर यस्तै आउँथ्यो । केही कमेडी, केही सामाजिक तथा धार्मिक कुरा आउँथे । पहिलो गीतको कुमारी होइन... भन्ने भल्गर भयो भनियो । सुरुदेखि नै नराकात्मकता बढी भइरहेको छ ।

योपटक अली बढी नै नकारात्मक टिप्पणी भएको हो ?
एउटा चलचित्रले आफ्नो प्रचारप्रसारका लागि अर्काको म्याटरमा गएर अर्कालाई गाली गर्न लगाउँछ । युट्युब खोल्न पाएको छैन पहिल्यै गाली गर्न सुरु भइसकेको हुन्छ । हामी ट्रेलरको प्रिमियरमा थियौँ, त्यति बेलै उनीहरूको चलचित्रको प्रचार गर्दै हामीलाई गाली गर्न थालिसकेका थिए । 

एउटा ठूलै समूह अब छक्का पञ्जालाई कामले सकिन्न, यसलाई डिमोटिभेट गरौँ भनेर ठूलो समूह लागेको छ । भोलि चलचित्रको प्रतिक्रियाका लागि हामीले मनस्थिति बनाइसक्यौँ ।

तर, छक्का पञ्जाको स्वाद बसिसकेका दर्शकलाई सामाजिक सञ्जालको यो नकरात्मकताले केही असर गर्दैन ।

मिडियामा अन्तर्वार्ता र विज्ञापन त खासै देखिँदैन, ब्रान्डप्रतिको आत्मविश्वास नै हो ?  
तुलनात्मक हिसाबले त हामीले धेरै विज्ञापन गरेका छौँ । हाम्रो सिनेमाका पब्लिसिटी कन्टेनहरू नै घरघरमा पुगेका छन् । हाम्रो ‘ब्रेकअप सङ’ हरेकको घरघरमा पुगेको छ । हरेकले टिकटक बनाउनुभएको छ । अहिलेको पब्लिसिटी र ब्रान्डिङ भनेकै यसैगरी त हुने हो ।

बहसहरूमा हिँडिरहेका छौँ । हाम्रोतर्फबाट सक्दो गरिरहेका छौँ । सिरिज र सिक्वेलको फाइदा पनि हो, यो चलचित्र यो मितिमा आउँदै छ भनेपछि अरू धेरै प्रचार नै गर्नु पर्दैन ।

अरू दुई फिल्म पनि आक्रामक रूपमा आइरहेका छन्, त्यसको असर कत्तिको पर्ला ?
अरूले गरेको प्रचार हाम्रो चलचित्रको म्याटरमा आयो । छक्का पञ्जाको जे म्याटर हाले पनि त्यहाँ आएर १२ गाउँ लेखिदिन्छन् । यो नकारात्मक पक्ष हो । गाली गरिरहेका छन् । यसको फिल्म बहिष्कार गर्नुपर्छ भनिरहेका छन् । हाम्रो चलचित्र बहिष्कार गर्नुपर्ने कारण के छ ?

मेरो हरेक सिनेमाप्रति ठूलो सदाशयता छ । तर, यहाँ एउटालाई समाप्त गरेर अर्को उदय हुन चाहन्छ । मेरो भनाइ यत्ति हो– चलचित्र क्षेत्रमा राजनीतिजस्तो हुनु भएन । 

आफ्नो प्रचार गरौँ, त्यसले राम्रो गर्छ । अर्काको दुष्प्रचार गर्ने, जे आयो त्यसलाई गाली गरेर के हुन्छ ?

पछिल्लो समय नेपाली समाजमा नकारात्मक पक्ष हाबी भइरहेको हो ? यसलालाई कसरी न्यूनीकरण गर्न सकिएला ? 
सामाजिक सञ्जालले चोरलाई साधु र साधुलाई चोर बनाउने अवस्था छ । यसलाई कसै गरी सकिएन, यसलाई के गर्ने सोच्ने बेला आयो । नकारात्मक पक्ष उचालेर यसलाई सक्नुप¥यो भनेर लाग्ने कि कलात्मक भएर आउने ?