काठमाडौं । उपन्यासकार कल्पना खरेलको अर्को उपन्यास ‘भृकुटीतारा’ एक कार्यक्रमबीच लोकार्पित भएको छ । बिहीबार अनामनगरमा आयोजित कार्यक्रममा प्रमुख अतिथि मदनदास श्रेष्ठ लगायतले कृति सार्वजनिक गरे ।

प्रमुख अतिथि अभिनेता श्रेष्ठले धेरैअघि भृकुटीतारा शीर्षकको एउटा नाटक हेरेको सन्दर्भ उल्लेख गर्दै लेखकले भृकुटीलाई उपन्यासका रूपमा ल्याउने चुनौतीपूर्ण काम गरेको बताए । प्रा.डा. गोविन्दमानसिंह कार्कीले कृतिमाथि समीक्षात्मक चर्चा गर्दै यो ऐतिहासिक उपन्यास भएको उल्लेख गरे । 

अनेसासकी पूर्वअध्यक्ष गीता खत्रीले आफू तिब्बत क्षेत्रमा केही समय बस्दाको अनुभव सुनाइन् । 

उपन्यासकार खरेलले आफूले उपन्यास लेख्दा गरेको मिहिनेत र अनुसन्धानबारे जानकारी दिइन् ।

आयोजक संस्था साहित्यिक पत्रकार संघका अध्यक्ष राधेश्याम लेकालीले यो ऐतिहासिक उपन्यासले पाठकको मन जित्ने विश्वास व्यक्त गरे ।

कार्यक्रममा साहित्यकारहरू प्रमोद प्रधान, लक्ष्मण गाम्नागे, सन्ध्या पहाडी, डा. सदानन्द कडेल, डा. दामोदर पुडासैनी किशोर, शंकर भारती लगायतले कृतिको चर्चा गरे ।

यो उपन्यास मञ्जरी प्रकाशनले बजारमा ल्याएको हो । यसअघि खरेलका केही उपन्यास, कथा र गीतका कृति प्रकाशित छन् ।