वाग्मती । कुलेखानी प्रथम जलविद्युत् केन्द्रको जलाशय (इन्दसरोवर ताल)मा पानीको सतह घट्न थालेको छ ।  

जलाशयमा क्षमताभन्दा बढी पानी भरिएर ‘ओभरफ्लो’ भएपछि बाँधको सुरक्षालाई मध्यदिँदै आज बिहान ५ बजे ड्यामको दुई ढोका खोलिएको थियो । कुलेखानी प्रथम जलविद्युत् केन्द्रका प्रमुख तारादत्त भट्टले जलाशयमा पानीको सतह केही घटेको जानकारी दिए ।  

उनका अनुसार कुलेखानीको जलाशयमा एक हजार ५३० मिटर पानी भण्डारण गर्ने क्षमता भए पनि आज बिहान ४ बजेतिर जलाशयमा एक हजार ५३१ मिटर पानी भरिएरको थियो । पानी भरिएर खतराको संकेत देखिएपछि दुई ढोका ४ दशमल ५ मिटर खोलिएको थियो । 

ड्यामको दुई ढोका खोलिएपछि अहिलेसम्म जलसतह घटेर एक हजार ५३० दशमलव १० मिटरमा आइपुगेको प्रमुख भट्टले बताए ।

वर्षा अझै जारी रहेकोले जलाशयको ढोका खोलिएको र जलविद्युत् उत्पादन केन्द्र पूर्णक्षमतामा सञ्चालनमा ल्याइएको उनले जानकारी दिए ।  

यसैबीच, जिल्ला प्रशासन कार्यालय मकवानपुरले निरन्तर वर्षा भइरहेकाले जोखिमको आधारमा थप कुलेखानीको जलाशयको ड्यामका ढोका अझै खोल्नुपर्ने अवस्था देखिनसक्ने बताएका छन् । 

कुलेखानी बाँधदेखि तल सिस्नेरी हुँदै वाग्मती नदी किनारका बस्तीमा बाढी आउनसक्ने अवस्था देखिएको हुँदा कुलेखानीदेखि तलका तल्लो तटीय क्षेत्रमा बसोबास गर्ने बासिन्दाले उच्च सतर्कता अपनाउन आग्रह प्रशासनले हाग्रह गरेको छ । 

प्रमुख जिल्ला अधिकारी तीर्थराज चिलुवालले सम्बन्धित पालिकाका स्थानीय विपद् व्यवस्थापन समितिलाई समेत उच्च सतर्क र सुरक्षित स्थानको पूर्वतयारी गर्न आग्रह गरेका छन् । रासस