काठमाडौं । इजिप्टको कायरोस्थित नेपाली दूतावासले लेबनानमा रहेका नेपालीलाई अधिकतम सतर्कता र सचेतना अपनाउन अनुरोध गरेको छ । लेबनानको सेनासहितको राजनीतिक पार्टी हिजबुल्लाह र इजरायलबीच पछिल्ला केही दिनयता युद्ध चर्केपछि नेपाली दूतावासले त्यहाँ रहेका नेपालीलाई अधिकतम सतर्कता अपनाउन भनेको हो ।

“केही दिनयता लेबनानमा विकास भइरहेको परिस्थितिका सन्दर्भमा लेबनानमा रहेका सम्पूर्ण नेपाली नागरिकहरूलाई अधिकतम सतर्कता तथा सचेतना अपनाउन अनुरोध छ,” कायरोस्थित नेपाली दूतावासले बिहीबार जारी गरेको सूचनामा भनिएको छ ।

इजिप्टका लागि नेपाली राजदूत सुशिलकुमार लम्सालका अनुसार, एक हजारदेखि १२ सयसम्म नेपाली लेबनानमा कार्यरत छन् । तीमध्ये सात/आठ सय घरेलु कामदार छन् भने अन्य होटल तथा रेस्टुरेन्ट र उत्पादन क्षेत्रमा कार्यरत छन् । अहिले युद्ध चलिरहेको क्षेत्रमा नेपाली कार्यरत नरहेको जनाइएको छ । 

लेबनानमा संयुक्त राष्ट्रसंघको शान्ति मिसनमा अहिले ९७७ जना नेपाली सेना खटिएका छन् । शान्ति स्थापनाका लागि उनीहरूलाईलेबनान–इजरायल सीमा नजिक खटाइएको छ । 

नेपाली दूतावासले जारी गरेको सूचनामा लेबनानमा कुनै समस्या परेमा कायरोस्थित नेपाली दूतावास र लेबनानको राजधानी बेरुतस्थित अवैतनिक नेपाली वाणिज्यदूतावासका सम्पर्क गर्न भनिएको छ । 

समस्यामा परेमा कायरोस्थित नेपाली दूतावासका द्वितीय सचिव दीपक घिमिरेको २०१०९७७७२३४८ नम्बरमा र तृतीय सचिव माधवराज काफ्लेको २०१००२५०५९९७ नम्बरमा ह्याट्सएप गर्न दूतावासले भनेको छ ।

यस्तै, समस्यामा परेका नेपालीलाई बेरुतस्थित नेपाली अवैतनिक महावाणिज्यदूत मोहम्मद गोजायललाई ९६१३३०११८१, ९६१७१६८८८२१ र ९६१८१८८३७१३ नम्बरमा सम्पर्क गर्न भनिएको छ । दूतावासले लेबनानमा रहेका नेपालीको सूची अद्यावधिक गर्ने प्रयोजनाका लागि दूतावासको वेबसाइटमा गई आवश्यक विवरण उपलब्ध गराइदन पनि अनुरोध गरेको छ । 

केही दिनयता आफ्नै सेना भएको लेबनानको राजनीतिक पार्टी हिजबुल्लाह र इजरायलबीच युद्ध चर्किएको छ । हिजबुल्लाहको दक्षिण लेबनानमा पकड राम्रो रहेको छ, जुन क्षेत्र इजरायलको सीमासँग जोडिएको छ । 

पछिल्लो दिन इजरायलले दक्षिण लेबनानमा रहेका हिजबुल्लाहको अखडामा आक्रमण गर्दा ६०० जनाभन्दा बढी लेबनानीको मृत्यु भइसकेको अन्तर्राष्ट्रिय मिडियाले जनाएका छन् । हिजबुल्लाहले पनि इजरायलमा रकेट र मिसाइल प्रहार गरेको छ । 

इजरायलले अब लेबनानको हिजबुल्लाह प्रभावित क्षेत्रमा स्थल आक्रमण गर्ने तयारी गरिरहेको छ । यसले युद्ध झन् चर्किने संकेत गरेको छ । 

अमेरिका, बेलायतलगायत देशले ट्राभल एड्भाइजरी जारी गर्दै लेबनान भ्रमणमा नजान र लेबनानमा रहेका आफ्ना नागरिकलाई लेबनान छोड्न अनुरोध गरेका छन् । 

भारतले पनि बिहीबार ट्राभल एड्भाइजरी जारी गर्दै आफ्ना नागरिकलाई लेबनानको यात्रा नगर्न भनेको छ । बेरुतस्थित भारतीय दूतावासले जारी गरेको एड्भाइजरीमा लेबनानमा रहेका आफ्ना नागरिकलाई घरबाट बाहिर ननिस्कन पनि भनेको छ । 

भारतले मिलेसम्म आफ्ना नागरिकलाई लेबनान छोड्न र नमिलेको अवस्थामा दूतावासको सम्पर्कमा रहन भनेको छ ।