काठमाडौं । एक महिनाभित्र सिन्धुपाल्चोक र रसुवाका विभिन्न जलविद्युत् आयोजनाबाट निर्माण भएको २७०.३ मेगावाट विद्युत राष्ट्रिय ग्रीडमा जोडिने भएको छ ।

लामो समयदेखि विवाद रहँदै आएको सिन्धुपाल्चोकको मध्य भोटेकोसी जलविद्युत् आयोजनाको १०२ मेगावाट तथा रसुवाको रसुवागढी जलविद्युत् आयोजना १११ मेगावाट, माथिल्लो सान्जेन १४.८ मेगावाट र सान्जेन जलविद्युत् आयोजनाको ४२.५ मेगावाट गरी २७०.३ मेगावाट विद्युत् एक महिनाभित्र राष्ट्रिय प्रसारण ग्रीडमा जोडिनेछ ।

सन् २०१७ को डिसेम्बरमा चिलिमे–त्रिशुली २२० केभी प्रसारण लाइन निर्माणको प्रभावकारी सम्झौता भए पनि विभिन्न कारणले समयमै प्रसारण लाइन र सवस्टेशन बन्न नसक्दा निर्माण कार्य सम्पन्न उत्पादनमा जान सकेको थिएन ।

ऊर्जा जलस्रोत तथा सिँचाइ मन्त्री दीपक खड्काले प्रसारण लाइन निर्माणको काम ढिला हुँदा राज्यलाई दैनिक करोडौँ नोक्सानी भएकाले अब ढिलासुस्ती गर्ने कुनै छुट नरहेको बताए ।

“गरिब तथा विपन्न जनताको लगानी रहेको यस्ता आयोजनाको काम ढिलाई हुँदा जनता प्रत्यक्ष मारमा परेका छन्, अब हेलचक्याईं गर्ने ठाउँ छैन,” ऊर्जामन्त्री खड्काले भने ।

नुवाकोटको पैरेबेसीमा निर्माण भएको त्रिशुली थ्री बी हव २२०/१३२/३३ केभी (३२० एमभीए) क्षमताको सवस्टेशन र रसुवा जिल्लाको आमाछोदिङ्मो गाउँपालिका वडा नं ४ स्थित थम्बुचेतमा निर्माण भएको चिलिमे हव २२०/१३२/३३ केभी (३२० एमभीए) क्षमताको सवस्टेशन र २८ किलोमिटर चिलिमे–त्रिशूली २२० केभी प्रसारण लाइनको काम समयमा सम्पन्न नहुँदा उत्पादित विद्युत् खेर गइरहेको थियो ।

रसुवा र नुवाकोटका विभिन्न आयोजनाबाट उत्पादित विद्युत् त्रिशूली थ्री बी हव २२०/१३२/३३ केभी (३२० एमभीए) क्षमताको सवस्टेशनबाट उक्त जलविद्युत् काठमाडौंको मातातीर्थ सवस्टेशनमा पुर्याइनेछ ।     

चिलिमे हवदेखि त्रिशूली हवसम्मको २८ किलोमिटर लम्बाई भएको प्रसारण लाइनमध्ये २० किलोमिटर लम्बाईको डबल सर्किट लाइन (५१ वटा टावर) र ८ किलोमिटर लम्बाईको चार सर्किटलाइन (२४ वटा टावर) रहेका छन् । चार सर्किटलाइन रहको आठ किलोमिटर टावरमा निर्माणाधीन अपर त्रिशूली एक (२१६ मेगावाट)बाट उत्पादन हुने विद्युत्लाई त्रिशूली थ्रि वी हवसम्म जोडी राष्ट्रिय प्रसारण ग्रीडमा विद्युत् प्रवाह गरिनेछ ।

प्रसारण लाइनका लागि आवश्यक ७५ वटै टावरको फाउण्डेशन निर्माण भए पनि हाल त्रिशूली थ्री बी हवको छेउमा (६०० मीटर लम्बाइ),  मैलुङ बेसी (१२३५ मिटर लम्बाई) र हाकु (१४०० मिटर लम्बाई)मा तार तान्ने काम भइरहेको छ ।