काठमाडौं । श्रीलंकाका निम्ति प्रस्तावित नेपाली राजदूत रामकृष्ण भट्टराईका विषयमा संसदीय सुनुवाइ समिति अझै अनिर्णीत बनेको छ । सोमबार सिंहदरबारमा बसेको बैठक थप छलफलका निम्ति भन्दै स्थगन गरिएको हो ।

समिति सभापति ईश्वरी न्यापानेले मंगलबार (भोलि) पुनः बैठक बस्ने बताइन् । “थप छलफल गर्नुपर्ने भएकाले भोलि बस्ने गरी आजको बैठक स्थगित भएको छ,” उनले बाह्रखरीसँग भनिन् ।

भट्टराईले आफ्नो शैक्षिक योग्यताको प्रमाणपत्र उपलब्ध गराउन सकेका छैनन् । सोही कारण समितिले निर्णय गर्न नसकेको हो ।

राजदूत नियुक्तिसम्बन्धी निर्देशिका, २०७५ मा राजदूतमा सिफारिस हुने व्यक्ति नेपाल सरकारबाट मान्यताप्राप्त विश्वविद्यालयबाट कम्तीमा स्नातक उपाधि हासिल गरेको हुनुपर्ने उल्लेख छ । तर, भट्टराईले हालसम्म योग्यता पुग्ने शैक्षिक प्रमाणपत्र समितिमा बुझाएका छैनन् ।

यही असोज ३ गते बसेको समिति बैठकबाट परराष्ट्र मन्त्रालयमार्फत भट्टराईको शैक्षिक योग्यताको प्रमाणपत्र मागिएको थियो । “उहाँको शैक्षिक योग्यताको प्रमाणपत्र अझै प्राप्त भएको छैन । परराष्ट्र मन्त्रालयले डकुमेन्ट प्राप्त भएमा उपलब्ध गराउने भनि पत्र पठाएको छ । त्यसैले अब के गर्ने भोलि निर्णय हुन्छ,” स्रोतले भन्यो ।

समितिका एक सदस्यका अनुसार, भट्टराईले भारतमा अध्ययन गरेका हुन् । त्यहाँको शैक्षिक प्रमाणपत्र बुझाउन उनी हच्किएका छन् ।

सरकारले ०८१ साउन १४ गते एकैसाथ १८ देशका निम्ति नेपाली राजदूतमा विभिन्न व्यक्तिका नाम सिफारिस गरेको थियो । श्रीलंकाका लागि नेपाली राजदूतमा भट्टराईको नाम सिफारिस गरिएको थियो ।

१८ मध्ये संसदीय सुनुवाइका निम्ति १७ जनाको मात्र नाम पठाइएको थियो । एकजनाको नाम फिर्ता लिइएको थियो ।

संसदीय सुनुवाइपछि असोज ३ गते बसेको समितिको बैठकबाट १७ मध्ये १६ जनाको नाम अनुमोदन गरिएको थियो । आवश्यक कागजात (शैक्षिक प्रमाणपत्र) नपुगेको भन्दै श्रीलंकाका निम्ति राजदूतमा सिफारिस भट्टराईको सुनुवाइ स्थगन गरिएको थियो ।

समितिको बैठक आइतबार (हिजो) पनि आह्वान गरिएको थियो । तर, भट्टराईको शैक्षिक प्रमाणपत्र उपलब्ध नभएकाले बैठक बस्दै नबसी स्थगन गरिएको थियो ।