काठमाडौं । सन नेपाल लाइफ इन्स्योरेन्स कम्पनी लिमिटेडले आफ्नो सातौँ वार्षिकोत्सवको अवसर पारेर दुई नवीनतम बिमा योजना सार्वजनिक गरेको छ । सातौँ वार्षिकोत्सवको अवसरमा आइतबार कम्पनीले सनलाइफ मेडिकेयर र सुनौलो बाल समृद्ध जीवन बिमा योजना सार्वजनिक गरेको हो ।

सुनौलो बाल समृद्ध जीवन बिमा योजनामा प्रस्तावकको निधनमा भुक्तानी निश्चित गरिएको छ । यसमा बिमा अवधिभित्र प्रस्तावकको निधन भएमा बिमांक रकम भुक्तानी हुनेछ र बिमितलाई बिमा अवधिसम्म बिमांक रकमको दुई प्रतिशतसम्म मासिक आय सुविधा रकम प्रदान गर्ने व्यवस्था रहेको कम्पनीले जनाएको छ ।

यसमा प्रस्तावकको घातक रोगको उपचारमा ५० लाख रुपैयाँसम्म बिमा कम्पनीले व्यहोर्ने आकर्षक विशेषता रहेको पनि जानकारी गराइएको छ ।

‘सनलाइफ मेडिकेयर’ आपत्कालीन अवस्थामा औषधि उपचार गर्न सहज होस् भन्ने हेतुले अघि सारिएको बिमा योजना हो । यसप्रकारको बिमा योजना नेपालमा पहिलोपटक सन नेपाल लाइफबाट शुभारम्भ गरिएको जानकारी गराइएको छ ।

अस्पताल भर्ना भएर गरिने औषधि उपचारमा एक लाख रुपैयाँसम्म प्रदान गर्ने व्यवस्था रहेको यो योजनाअन्तर्गत आपत्कालीन उपचार गर्दा यसबाट आमनेपाली नागरिकले लाभ लिन सक्ने अपेक्षा गरिएको छ ।

वार्षिकोत्सवका अवसरमा कम्पनीले सन्देशमूलक भिडियो पनि लोकार्पण गरेको छ । संस्थागत सामाजिक उत्तरदायित्व (सीएसआर)अन्तर्गत तयार गरिएको म्युजिक भिडियोमा वैदेशिक रोजगारीसँग सम्बन्धित उपयोगी सन्देश रहेका छन् ।