काठमाडौं । डा. श्रीधर खनालको लेखनीमा एआई र रोबोटिक्समा आधारित उपन्यास ‘सावर्णि’ एक समारोहका बीच सार्वजनिक भएको छ । बालरोग विशेषज्ञ डा. खनालको यो साइन्स फिक्सन प्रज्ञा प्रतिष्ठानको डबलीमा सार्वजनिक भएको हो । 

शनिबार सम्पन्न कार्यक्रममा प्रा.डा. अभि सुवेदी, डा. रवीन्द्र समीर, सगुना शाह र कृतिकार खनालले उपन्यास संयुक्त रूपमा लोकार्पण गरे । कार्यक्रममा बोल्दै डा. समीरले अब मानिसहरू ‘सावर्णि’ युगमा प्रवेश गर्न लागेको उल्लेख गरे ।  

सगुना शाहले यदि मान्छेको अध्ययनको दायरा फराकिलो भए उसले पृथक किताब लिएर आउने बताइन् । 

लेखक डा. खनालले सबैलाई धन्यवाद दिँदै बाह्रखरी कथा प्रतियोगिता आफ्नो कथा उत्कृष्ट २५ भित्र पर्न सफल भएको उल्लेख गरे । उनले यही उपन्यासको केही अंश समेटेर उक्त कथा तयार पारेको बताए । 

पेसाले बालरोग विशेषज्ञ रहेका खनाल अस्तित्व फाउन्डेसनका संस्थापक समेत हुन् । यस फाउन्डेसनले क्यान्सर जस्ता घातक रोग लागेका बालबालिकाको उपचारमा सहयोग गर्दै आएको छ । ‘सावर्णि’को रोयल्टीबाट प्राप्त केही प्रतिशत रकम खनालले यही फाउन्डेसनमार्फत समाज सेवामा लगाउने बताए ।

पुस्तकलाई बुकहिलले बजारमा ल्याएको हो ।