काठमाडौं । एसिया रग्बीको आयोजना तथा नेपाल रग्बी संघको व्यवस्थापनमा असोज १८ र १९ गते काठमाडौंमा आयोजना हुने महिला तथा पुरुष एसिया रग्बी सेभेन्स ट्रफीमा १७ राष्ट्रले प्रतिस्पर्धा गर्ने भएको छ । जसमा पुरुषतर्फ १४ तथा महिलातर्फ आठ टोलीले भाग लिन लागेको बुधबार आयोजित पत्रकार सम्मेलनमा नेपाल रग्बी संघका अध्यक्ष दीपक देवकोटाले बताए । 

यसअघि नेपाल रग्बी संघले सन् २०२२ मा एसिया रग्बी यू–१८ सेभेन्स र सन् २०२३ मा एसिया रग्बी यू–२० सेभेन्सको आयोजना गरिसकेको थियो । संघले आयोजना गर्न लागेको यो तेस्रो ठूलो अन्तर्राष्ट्रिय प्रतियोगिता हो । 

प्रतियोगिता त्रिपुरेश्वरस्थित दशरथ रंगशालामा हुनेछन् । प्रतियोगिताका लागि कुल ४५० भन्दा धेरै खेलाडी तथा अफिसियलले सहभागिता जनाउनेछन् । दुवै तर्फका विजेताले ट्रफी र मेडल प्राप्त गर्नेछन् । दोस्रो र तेस्रो स्थान हासिल गर्ने टोलीले पनि पदक पाउनेछन् । 

प्रतियोगिताको अनुमानित बजेट करिब दुई करोड २० लाख रुपैयाँ रहेको बताइएको छ । एसिया रग्बी सेभेन्स ट्रफी एसियाली खेलकुद र ओलम्पिक छनोटको माध्यम समेत रहेको संघका महासचिव गोविन्दबहादुर घिमिरेले बताएका छन् । 

उनका अनुसार जारी प्रतियोगिताका अन्तिम दुई टोली रेलिगेशनमा पर्नेछ भने च्यालेन्ज कपका शीर्ष दुई टोली एसिया रग्बी सेभेन्समा उक्लिनेछन् । संघले एसिया रग्बी सेभेन्सको तयारीका लागि न्युजिल्यान्डका अनुभवी प्रशिक्षक मुरे पउल स्टुर्टलाई नियुक्त गरेको थियो । मुरेको प्रशिक्षणमा नेपालका दुवै टोलीले भक्तपुरमा दुई महिना प्रारम्भिक प्रशिक्षण र पोखरामा बन्द प्रशिक्षणमा छन् । 

यसै प्रतिस्पर्धाका लागि नेपालको १६ सदस्यीय महिला पुरुष टोलीको घोषणा भैसकेको छ । संघका महासचिव घिमिरेका अनुसार नेपालले यस प्रतियोगितामार्फत एसियाली वरीयतामा पनि सुधार गर्ने लक्ष्य राखेको छ । एसियामा नेपाल अहिले पुरुषतर्फ १० तथा महिलातर्फ छैटौँ वरीयतामा छन् । यसअघि एसिया रग्बीका खेल दशरथ रंगशालामा आयोजना नगर्न प्रधानमन्त्री केपी शर्मा ओलीको निर्देशन भएको चर्चा चलेको थियो । 

पत्रकार सम्मेलनमा संघका अध्यक्ष देवकोटाले नेपाल रग्बी संघ परिवारले प्रधानमन्त्रीलाई भेटेर विषय स्पष्ट पारिसकेको बताए । उनले भने, “यसअघि गलत सूचना पुगेको रहेछ । हामीले विश्वका अधिकांश स्थानमा फुटबल मैदानमा नै रग्बी खेल हुने गरेको तथ्य स्पष्ट पार्यौं । उहाँले विषय बुझिसक्नुभयो ।”