बझाङ । बझाङमा पर्ने जयपृथ्वी राजमार्ग तीन दिनदेखि अवरुद्ध छ । बिहीबारदेखि निरन्तरको वर्षाले छबिसपाथिभेरा गाउँपालिकाको बालुवाटारनजिकै पहिरो खस्दा सडक अवरुद्ध भएको हो ।

पहिरोले सडक अवरुद्ध हुँदा कैलाली, कञ्चनपुर जाने र आउने सबै सवारीसाधन रोकिँदा यात्रु अलपत्र परेका छन् । पहिरो निरन्तर खसेकाले पन्छाएर सडक सञ्चालनमा ल्याउन नसकिएको सहायक प्रमुख जिल्ला अधिकारी सत्यकुमारी जोशीले जानकारी दिइन् ।

उनले केदारस्यूँ गाउँपालिका र जयपृथ्वी नगरपालिकाको जेसीबी पहिरो पन्छाउन तयारी अवस्थामा राखिएको बताइन् । तर, पहिरो झर्ने क्रम नरोकिएकाले सडक सञ्चालनमा ल्याउन नसकिएको उनले बताइन् ।

सहायक प्रजिअ जोशीका अनुसार, शनिबार बिहानदेखि दुई जेसीबी पहिरो गएको स्थाननजिक राखिएको छ । “माथिबाट पानीसहितको लेदो आइरहेकाले शनिबार दिनभर सञ्चालन गर्न सकिएन । पहिरो रोकिएपछि मात्रै सडक खुलाउने प्रयास गर्नेछौँ,” उनले भनिन् ।

शुक्रबार कैलाली तथा कञ्चनपुरबाट आएका यात्रु सामान बोकेर स्थानीय जीपमा गन्तव्यतिर गएका थिए । बझाङबाट तराई छिर्ने सवारीका यात्रु परिङालनजिकै पर्ने बालुवाटारमा रोकिएका दुर्गाथली गाउँपालिकाका स्थानीय विक्रम जाग्रीले बताइन् ।

गत साता पनि छबिसपाथिभेरा गाउँपालिकाको तमैल बजारनजिकै पहिरो खस्दा दुई दिनसम्म सडक अवरुद्ध भएको थियो । रासस