काठमाडौं । स्ट्राइकर एर्लिङ हाल्यान्डप्रेरित म्यानचेस्टर सिटीले इंग्लिस प्रिमियर लिगमा लगातार चौथो जित निकालेको छ ।

शनिबार राति घरेलु मैदान इत्तिहाद रंगशालामा भएको खेलमा सिटीले ब्रेन्टफोर्डविरुद्ध १–० ले पछि परेको अवस्था उल्ट्याउँदै २–१ को जित निकालेको हो । सिटीको जितमा दुवै गोल हाल्यान्डले गरे ।

खेलको पहिलो मिनेटमै ब्रेन्टफोर्डका योएन विसाले गोल गरेपछि सिटी ०–१ ले पछि परेको थियो । तर, सिटीले पहिलो हाफमै खेलमा पुनरागमन गर्यो । १९औँ मिनेटम हाल्यान्डले पहिलो गोल गर्दै सिटीलाई खेलमा फर्काए । यस्तै, ३२औँ मिनेटमा हाल्यान्डले नै घरेलु टिमलाई २–१ को अग्रता दिलाएका थिए । यसपछि दुवै टिमबाट थप गोल हुन नसक्दा सिटीले तीन अंक पक्का गरेको हो ।

प्रिमियर लिग गोल्डेन बुट दौडको शीर्ष स्थानमा रहेका हाल्यान्डले चार खेलमै नौ गोल गरिसकेका छन् । उनले यसअघि पहिलो खेलमा एक गोल गर्दा दोस्रो र तेस्रो खेलमा ह्याट्रिक गरेका थिए ।

लिगमा लगातार चौथो जित निकालेको सिटी १२ अंकसहित तालिकाको शीर्ष स्थानमा छ । सिटीलाई पछ्याइरहेको लिभरपुलको नौ अंक छ । समान खेलबाट ६ अंक जोडेको ब्रोन्टफोर्ड तालिकाको नवौँ स्थानमा छ ।