काठमाडौं । चलचित्र ‘पूर्णबहादुरको सारङ्गी’ कात्तिक १५ गते रिलिज हुँदै छ । यस चलचित्रमा विजय बराल र प्रकाश सपूतको मुख्य भूमिका छ । केही दिन अगाडि यस चलचित्रको टिजर सार्वजनिक भएको थियो । 

बुवाको मुख हेर्ने अघिल्लो दिन सार्वजनिक गरिएको टिजरलाई चलचित्रकर्मीसँगै धेरैले आफ्नो बुवालाई शुभकामना दिँदै फेसबुकमा सेयर गरे । टिजरको धेरैले तारिफ गरे । 

तर, यो टिजर चलचित्रका कलाकार प्रकाश स्वयंले सेयर गरेका छैनन् । उनको फेसबुकमा टिजर देखिँदैन । पछिल्लो समय कलाकार तथा निर्देशक र निर्माता डिजिटल प्रचारप्रसारमै धेरै महत्त्व दिन्छन् । सामाजिक सञ्जालमा आफ्ना चलचित्रका गीत, पोस्टर टिजर, ट्रेलर सेयरमात्र होइन, पैसा तिरेर बुस्ट नै गर्छन् । त्यसैले राम्रो फ्यान फलोइङ भएका कलाकारले यसलाई थप जोड दिन्छन् ।

तर, धेरैले मन पराएको र तारिफ गरेको टिजर प्रकाश आफैँले भने सेयर गरेनन् । जुन टिजरले उनी स्वयंलाई प्राथमिकता दिएको छ ।  

चैत २२ गते प्रदर्शन हुने चलचित्र ‘वसन्त’को पोस्ट र पोस्टर भने प्रकाशको फेसबुक वालमा प्रशस्तै देखिन्छ । ‘वसन्त’लाई प्रकाश स्वयंले निर्देशन गर्दै छन् । 

स्रोतका अनुसार, प्रकाश ‘पूर्ण बहादुरको सारङ्गी’ भन्दा ‘वसन्त’ पहिला रिलिज होस् भन्ने चाहन्थे । तर, विभिन्न कारणले ‘पूर्ण बहादुरको सारङ्गी’ अगाडि रिलिज हुने भएपछि उनले यसको टिजर सार्वजनिक नगरेको स्रोतले बताएको छ । 

पुस २६ गते चलचित्र ‘कार्साङ’ रिलिज हुँदै छ । यसको मुख्य भूमिकामा अभिनेता दयाहाङ राई छन् । दयाहाङले पनि चलचित्र ‘कार्साङ’को पोस्टर सार्वजनिक गरेका छैनन् । 

उनको फेसबुक पेजमा अन्य चलचित्रका पोस्ट छन् । सबैभन्दा धेरै ‘साम्बाला’का सामग्री छन् । ‘पूजा सर’का सामग्री पनि उनको फेसबुक वालमा छन् ।