काठमाडौं । नेपाली कांग्रेसकी सांसद रमा कोइराला पौडेलले लुम्बिनी प्रदेश सांसद रेखा शर्मालाई कारबाही मागको गरेकी छन् ।

सोमबार प्रतिनिधिसभा बैठकमा उनले बाल श्रम शोषण गरेको आरोप लागेकी एमालेकी प्रदेश सांसद शर्मालाई कारबाही गनुपर्ने धारणा राखिन् ।

“निकृष्ट प्रकारले बाल श्रम प्रयोग गरेको देखिन्छ । माननीयज्यू, जो कानुन बनाउनुहुन्छ,” उनले भनिन्, “कानुनले नै बालश्रमलाई निषेधित गरेको छ । कानुन बनाउने नै बालश्रम प्रयोग गर्ने ? त्यस्ता व्यक्तिलाई सरकारले कारबाही गर्नुपर्छ ।”

सोही विषयमा केही समयअघि काठमाडौं महानगरका मेयर बालेन्द्र शाहले प्रदेश सांसद शर्मालाई कारबाही कहिले गर्ने भन्दै प्रधानमन्त्री केपी शर्मा ओलीलाई प्रश्न गरेका थिए । तर, सांसद शर्माले आफूले शोषण नगरेको बताउँदै आएकी छन् ।