सत्तामा हुनेहरूलाई लाग्दो हो उनीहरूले शासनको बागडोर थामेर जनतालाई गुन लगाएका छन् । जनताले भने सरकारले तिनका सानातिना समस्या कसरी सहज बनाउँछ त्यसैका आधारमा मूल्याङ्कन गर्छन् । 

परराष्ट्रमन्त्रीलाई भारतका प्रधानमन्त्रीले महत्त्व दिएको वा नयाँ अर्थमन्त्री नियुक्त भएपछि सेयर बजारमा वृद्धि भएको समाचारले जनतालाई फरक पर्दैन ।तिनको ध्यान त दैनिक जीवनको अवस्थामा हुन्छ । 

कुनै पनि सरकारले चमत्कार गर्न सक्तैन । नागरिकले पनि सरकारबाट चमत्कार खोजेका हुँदैनन् । सरकारले अलिकति महत्त्व दिएमा सजिलै हुनसक्ने काम गरिदेओस् भन्ने जनचाहना हुन्छ ।

नेपालीको सबैभन्दा ठूलो पर्व दसैं नजिकिँदै छ । घटस्थापना सुरु हुन महिना दिन पनि बाँकी छैन । यसैले दसैंमा असुविधा नभए धेरैले सरकारलाई धन्य भन्नेछन् । 

दसैं नेपालीको सबैभन्दा बढी आवागमन गर्ने अवसर पनि हो । तर, नेपालका अधिकांश सडकको अवस्थाले भने यतिबेला सडक यात्रा गर्न ‘ज्यानकै बाजी थापे’जस्तै हुनेगर्छ । 

सहायक कच्ची सडकमा वर्षा यामका कारण केही असुविधा हुनु उति अस्वाभाविक नहोला । तर, राजमार्ग भनिएका मुख्य सडकहरूको अवस्था पनि पटक्कै सुरक्षित र सुविधाजनक छैन । 

मुख्य राजमार्गहरूसमेत वर्षौंसम्म यात्रा गर्नै नसकिनेगरी अलपत्र पारिएका छन् । यसको मुख्य कारण  सरकारी लापरबाही नै हो । यात्रुको सुविधा र सुरक्षालाई सरकारले कहिल्यै प्राथमिकता दिएन ।  

यसपटकको चाडपर्वको अवसरमा हुने सडक यात्रा सरकार जनताप्रति कति संवेदनशील  छ भन्ने थाहा हुनेछ । यात्रुको सुरक्षा र सुविधा नै सरकारको मूल्याङ्कन गर्ने कसी हो ।  

राजमार्गहरूको अवस्थामा रातारात सुधार गर्नु असम्भव नभए पनि निकै कठिन काम हो । तर, यातायातको व्यवस्थापनलाई प्राथमिकता दिए यात्रालाई सुरक्षित र सुविधाजनक बनाउन सकिन्छ । 

यात्रु धेरै हिँड्ने मुख्य सडकका खाल्टा अस्थायीरूपमै भए पनि पुरेर सवारी साधन सहजरूपमा चल्न सक्ने बनाउन तत्काल थाल्नुपर्छ । तुरुन्तै सुरु नगरे दसैंमा मुख्य सडकहरू यात्रा योग्य बन्न सक्तैनन् ।

यसैगरी यात्रुको चाप धेरै हुने समयमा मालवाहक ठूला गाडी चल्न पनि रोक्नेगरी यात्रा व्यवस्थापन गर्नुपर्छ । ठूला गाडीले बाटो छेकेनन् भने यात्रुवाहक सवारी साधनलाई गन्तव्यमा पुग्न सहज हुनेछ । 

यति गर्न न अतिरिक्त बजेट नै चाहिन्छ न धेरै समय नै लाग्छ । विगतमा पनि सरकारले यस्तो प्रयत्न त गर्थ्यो तर त्यो झारा टार्ने किसिमको हुन्थ्यो ।

कम्तीमा काठमाडौं(पोखरा र नारायणगढ(बुटवल सडकमा यात्रुहरूले सजिलोसँग आवागमन गर्न पाए भने सरकार साँच्चै नै नागरिकप्रति जिम्मेवार रहेको मान्न सकिनेछ । नत्र,  यो सरकार पनि अभिशापमात्र ठहरिनेछ ।