काठमाडौं । गायिका विष्णु माझीको तीज गीतको चर्चा सेलाउन नपाउँदै अर्को गीत आउने भएको छ । उनको स्वरमा दशैँको गीत आउने भएको हो । 

सुन्दरमणि अधिकारी अहिले दसैँको गीत ल्याउने तयारीमा जुटिसकेका छन् । स्रोतका अनुसार उनी भिडियो निर्माणको तयारीमा छन् । सुन्दरमणि विष्णु माझीका श्रीमान् हुन् । 

“तीजको गीतपछि अब विष्णु माझीको स्वरमा दशैँको गीत आउँदैछ । सुन्दरमणिजी अहिले दशैँ गीतको तयारीमा जुटिसक्नु भएको छ,” स्रोतले भन्यो, “गीतको भिडियो पनि निर्माण गर्ने तयारी भइरहेको छ । उहाँले पछिल्लो समय काम गरिरहेका कोरियोग्राफर र प्राविधिकसँग भिडियोको काम गर्दै हुनुहुन्छ ।” 

• ‘कोही छ विष्णु माझीलाई मैले गायिका बनाएको हुँ भन्ने ? च्यालेन्ज गर्छु’

केही वर्षदेखि अरुका गीत विष्णु माझीले गाएकी छैनन् । तीजका गीतमै उनको स्वर सीमित भइरहेको छ । 

तर, अहिले एउटा समूहले विष्णु माझीलाई बल्कमै गीत गाउन लगानउ तयारी गरिरहेको छ । अनामनर कार्यालय रहेको उक्त समूहले विष्णु माझीलाई एकै पटक १० वटा गीत गाउन लगाउने तयारी गरिरहेको छ । 

“त्यो समूहले सुन्दरमणिलाई प्रस्ताव गरिसकेको छ । सम्भवत कुरा मिल्यो भने विष्णु माझीले १० वटा गीत गाउनुहुनेछ,” स्रोतले भन्यो, “तर पैसा लगायत केहीमा कुरा मिल्न बाँकी रहेको मैले सुनेको छु । उक्त समूहले सुन्दरमणिलाई मनाउन सक्यो भने लगातार विष्णु माझीका १० वटा गीत आउनेछन् ।” 

नेपालका टपटप कलाकार राखेर विष्णुका गीतमा भिडियो बनाउने सो समूहको लक्ष्य रहेको स्रोतले बतायो । 

• ‘अर्धभूमिगत’ विष्णु माझीको कसरी तयार गरिन्छ गीत र भिडियो ?

तीन वर्षअगाडि अरुका गीत गाउँदा विष्णु माझीले एउटा गीत गाएको दुई लाख रुपैयाँ लिन्थिन् । त्यसपछि सुन्दरमणिले पुनः त्यसमा पनि पारिश्रमिक बढाउन खोजेपछि विष्णुलाई हालसम्म कसैले पनि गीत गाउन लगाएका छैनन् । 

अब उनले अरुका गीत गाइन् भने प्रतिगीत गाइदिएको कति पारिश्रमिक लिन्छिन् होला त्यो भने हेर्न बाँकी छ । 

केही समय अगाडि मात्रै विष्णु माझीको स्वरमा ‘आइन आमा यो तीजमा...’ बोलको गीत गाएकी थिइन् । जसको ठूलो चर्चा भएको थियो ।