काठमाडौं । चितवनस्थित कविडाँडा साहित्य समाजले २०८० सालको ‘कविडाँडा राष्ट्रिय आख्यान’ पुरस्कार कृष्ण गौतमको उपन्यास ‘अद्वैत’ लाई प्रदान गर्ने निर्णय गरेको छ । समाजले प्रत्येक वर्ष आख्यानकृतिलाई पुरस्कृत गर्दै आएको छ ।

समाजका अध्यक्ष एल.बी. क्षेत्रीद्वारा जारी विज्ञप्तिमा कृतिले पूर्वीय सभ्यताले प्रतिपादन गरेको अद्वैत सिद्धान्तलाई विभाजित विश्वलाई जोड्ने कडीको रूपमा पहिचान गरेको उल्लेख छ ।

समाजले केही समयअघि उत्कृष्ट पाँच आख्यानको सूची सार्वजनिक गरेको थियो । जसमा पुरस्कृत ‘अद्वैत’का साथै सानु शर्माको कथाकृति ‘अर्को देशमा’, विश्व कुइँकेलको उपन्यास ‘गोपिचा’, गोविन्दप्रसाद कुसुमको उपन्यास ‘भृकुटी’ र रोशन थापा ‘नीरव’को उपन्यास ‘सन्त्रासका साठी दिन’ परेका थिए ।

पुरस्कारका साथ नगद राशि एक लाख २५ हजार रुपैयाँ प्रदान गरिने विज्ञप्तिमा उल्लेख छ । उपन्यास शिखा बुक्सले प्रकाशनमा ल्याएको हो ।