काठमाडौं । प्रधानमन्त्री केपी शर्मा ओलीले सञ्चार तथा सूचना प्रविधिमन्त्री पृथ्वीसुब्बा गुरुङलाई ‘जिब्रो थुत्नुपर्ने’ शब्द कुन सन्दर्भमा बोलेको भनि सोधेका छन् । प्रधानमन्त्रीले सोमबार उक्त जिज्ञासा राखेको गुरुङले बताए । 

“आज कान्तिपुरमा समाचार आयो के भयो ? तपाईंले कुन सन्दर्भमा भन्नुभएको हो ?,” सोमबार राष्ट्रिय समाचार समितिको कार्यक्रममा गुरुङले प्रधानमन्त्रीको जिज्ञासा सुनाए । 

उनले पोखरामा प्रेस कन्फेन्समा पत्रकारले सोधेको प्रश्नमा जवाफ दिने क्रममा उक्त शब्द प्रयोग गरेको प्रधानमन्त्रीले जानकारी गराएका छन् । पत्रकारले मुख्यमन्त्री हुँदा शासन प्रणालीको कार्यान्वयनको ठाउँमा आफैँ हुँदा के भएको छ भनेर सोधेको प्रश्नमा जवाफ दिने क्रममा उक्त शब्द प्रयोग भएको प्रधानमन्त्रीलाई जानकारी गराएको उनले बताए । 

गुरुङले प्रहरीको विधेयकबारे विदेशीहरू पनि भएको कार्यक्रममा प्रहरीका हाकिमहरूले संविधानविरुद्ध बोल्दा जिब्रो थुतिदिनुपर्थ्यो भनेको सुनाए । “प्रहरीका पुराना र वर्तमान हाकिमहरूले नेशनल सेक्युरिटीका कारणले हामी प्रहरी समायोजन गर्न सक्दैनौँ भन्ने सुनेको थिएँ । विदेशीहरूले पनि भनेका थिए,” गुरुङले प्रधानमन्त्रीलाई भनेका छन्, “प्रहरीका हाकिमले संविधान, शासन प्रणालीले गरेको व्यवस्थाविरुद्ध नबोल्नुपर्ने हो । त्यसरी बोलेबापत तिनीहरूको जिब्रो थुत्नुपर्थ्यो भन्ने सन्दर्भमा शब्द प्रयोग गरेको हो ।” 

प्रधानमन्त्रीले गुरुङलाई विवादित हुने गरी नबोल्न निर्देशन दिएका छन् । “सरकारका प्रवक्ता पनि हुनुहुन्छ । बोल्दा, भाषा प्रयोग गर्दा विवादमा आउने खालको भाषा प्रयोग गर्ने कुरामा सचेत हुनुपर्छ भन्नुभयो,” गुरुङले भने । प्रधानमन्त्रीले गुरुङलाई लामो नबोल्न पनि सुझाएका छन् । 

ओलीले गुरुङले बेठिक कुरा नभने पनि शब्द चयनले उद्धेलित बनाएको पनि बताएका छन् । गएको शनिबार प्रेस चौतारीले पोखरामा गरेको कार्यक्रममा गुरुङले प्रहरी समायोजन आए आईजीपीले मान्दिनँ भनेको सुनेको बताएका थिए । “अहिले प्रहरीको आईजीपीले के भन्नु भो ? म यो कानुन लागु नै गर्दिनँ भन्नुहुन्छ । त्यस्तो बोल्न पाउने कि नपाउने ? त्यसको जिब्रो थुत्नुपर्थ्यो, मैले भन्दाखेरि,” गुरुङले भनेका थिए, “सरकारको नीतिको, व्यवस्थाको विरुद्धमा एउटा संस्थाको प्रमुखले बोल्न पाउँदैन नि ।”