विराटनगर । मोरङको सुन्दरहरैँचास्थित केराबारी घारीमा मृत भेटिएका दुई बालिकाकी आमाको अझै अत्तोपत्तो लागेको छैन । उनको खोजीकार्य तीव्र पारिएको प्रहरीले जनाएको छ ।

बालिका मृत भेटिएकै दिनदेखि आमा २९ वर्षीया अस्मिता न्यौपाने सम्पर्कविहीन छिन् । सुन्दरहरैँचाका ५०० भन्दा धेरै स्थानीयको सहयोगमा नजिकैको चारकोसे जंगलमा ‘सर्च’ गरिएको छ । तर, उनको केही अत्तोपत्तो नलागेको प्रहरीले जनाएको छ ।

सुन्दरहरैँचा नगरपालिका–७ स्थित केरा बगानभित्र शनिबार दुई बालिका मृत भेटिएका थिए । धनकुटाको पाख्रिबास नगरपालिका–४, डिकुरे घर भई सुन्दरहरैँचा–७ मा बस्दै आएका अर्जुन कार्कीका छोरीहरू मृत भेटिएका हुन् ।

एक वर्षीया आइका कार्कीलाई उनकी दिदी तीन वर्षीया अर्पणाले अँगालो हालेको अवस्थामा दुई शव स्थानीयले देखेर प्रहरीलाई खबर गरेका थिए । कार्की परिवार स्थानीय मालती टोलका दिदी सीता रेग्मीको घरमा डेरा गरी बस्दै आएको थियो । उनीहरूले नजिकै नयाँ घर बनाउँदै थिए ।

घरमा पानी हाल्ने विषयमा श्रीमतीसँग सामान्य विवाद भएको अर्जुनले प्रहरीसमक्ष बताएको मोरङका डीएसपी ज्ञानेन्द्रबहादुर बस्नेतले जानकारी दिए ।

शनिबार साँझ अस्मिता दुई छोरीलाई लिएर घरबाट हिँडेकी थिइन् । घटनाको प्रकृति हेर्दा विष खुवाएर दुवै बालिकाको हत्या गरिएजस्तो देखिएको प्रहरीले जनाएको छ ।

शवनजिकै विषादीको बट्टा समेत फेला परेको छ । डीएसपी बस्नेतले बाह्रखरीसित भने, “घटनालाई गहन र सूक्ष्म ढंगले अध्ययन गरिरहेका छौँ ।”

प्रहरीका अनुसार, अस्मिताले बोक्ने गरेको मोबाइल ‘स्वीच अफ’ भएकाले ‘ट्रयाकिङ’ गर्न समेत कठिनाइ भएको छ । दुई बालिकाको शव परीक्षणका निम्ति धरानस्थित बीपी कोइराला स्वास्थ्य विज्ञान प्रतिष्ठानमा पठाइएको प्रहरीले जनाएको छ ।