पर्थ, अष्ट्रेलिया । गैरआवासीय नेपाली संघ अष्ट्रेलियाले हरेक दुई वर्षमा अष्ट्रेलियाका सहरहरुमा गर्दै आएको नेपाल महोत्सवको अर्को संस्करण आगामी सेप्टेम्बर १४ तारिख पर्थमा हुँदैछ । 

एनआरएन वेष्टर्न अष्ट्रेलियाको आयोजनामा गरिने नेपाल महोत्सवको उद्देश्य यहाँ हुर्किदै गरेको नेपालीको पछिल्लो पुस्तालाई नेपाली भाषा, संस्कृति, भेषभुषाबारे जानकारी गराउनुका साथै नेपालको पर्यटन क्षेत्रमा योगदान दिनु हो । यसका साथै एउटै ठाउँमा बसोबास गर्दै आएका नेपाली नेपालीबीच भाइचाराको अभिवृद्धि गर्न पनि नेपाल महोत्सवको महत्वपूर्ण योगदान दिँदै आएको छ ।

नेपाल महोत्सव पर्थ २०२४ लाई सफल बनाउन यसका संयोजक एवं एनआरएन अष्ट्रेलियाका उपाध्यक्ष शेखर घिमिरेसहित पूरै एनआरएन वेष्टर्न अष्ट्रेलियाको टिम सक्रियताका साथ लागेको छ । नेप्लीज एशोसिएसन अफ वेष्टर्न अष्ट्रेलियासहित संस्था, क्लब र व्यवसायीहरु यतिबेला सेप्टेम्बर १४ को नेपाल महोत्सवलाई लिएर उत्साही छन् ।

यसपटकको नेपाल महोत्सवमा अजी फाइनान्स एण्ड होम लोनले मुख्य प्रायोजन गरेको छ । नेपाल महोत्सवलाई सिटी अफ पर्थ, वेष्टर्न अष्ट्रेलिया बहुसांस्कृतिक मन्त्रालयले पनि आर्थिक सहयोग गरेको छ ।
 
नेपाल महोत्सव आयोजक समिति एवं एनआरएन डब्लूएका संयोजक शेखर घिमिरेका अनुसार, नेपाल फेष्टिभलमा वेष्टर्न अष्ट्रेलिया राज्य सरकारका उच्चपदस्थ अधिकारीहरु सहभागी हुने पक्का भइसकेको छ । नेपाल महोत्सवमा सहभागी हुन अष्ट्रेलियाका विभिन्न राज्यबाट एनआरएनका अभियन्ताहरु, सामाजिक व्यक्तित्व, नेपाली समुदायका अगुवाहरु पनि आउने तय भएको छ ।

संयोजक घिमिरेले भने, यस पटकको नेपाल महोत्सवमा नमूना सगरमाथा, ढुंगेधारा, बुद्धको मूर्तिदेखि नमूना धरहरासमेत हेर्न पाइने छ । हामीले बालबालिकाहरुलाई समय बिताउन सहज होस् भनेर धेरै रमाइला गतिविधि समावेश गर्दैछौं । नेपालको गीत–संगीत स्टेजमा घन्किने परम्परा कायमै राखेर यस पटक बहुसांस्कृतिक समुदायका प्रस्तुति पनि समेट्ने जमर्को हाम्रो छ ।

एनआरएन वेष्टर्न अष्ट्रेलियाका युवा संयोजक मनिष सिग्देलका अनुसार, महोत्सव नेपाल चिनाउने मेलाका रुपमा रहेकाले यसलाई भब्य बनाउन १० दिनअघिदेखि जमघटका ठाउँहरुमा प्रचार सामग्री राखिनेछ । यसले नेपालबारे यहाँको बहुसांस्कृतिक समुदायलाई जानकारी दिने र नेपाल महोत्सवको समेत प्रचार गर्ने अपेक्षा छ । 

नेपाल महोत्सवका दौरान सुप्रिम कोर्ट गार्डेनबाट ११ बजे कलश यात्रा गरी सुरु हुनेछ । यस पटकको नेपाल महोत्सवमा १२ हजार दर्शक सहभागी हुने अपेक्षा गरिएको  युवा संयोजक सिग्देलले बताए ।