काठमाडौं । नेपाली कांग्रेसकी सांसद प्रतिमा गौतमले सरकारले ल्याउने बजेट प्रभावकारी रूपमा विनियोजन नभएको बताएकी छन् । बुधबारको प्रतिनिधिसभा बैठकमा आर्थिक कार्यविधि तथा वित्तीय उत्तरदायित्व ऐन, २०७६ लाई संशोधन गर्न बनेको विधेयकमाथिको छलफलमा सांसद गौतमले बजेट बनाउने प्रक्रिया र यसको कार्यान्वयनमा प्रत्येक पटक प्रश्न उठ्ने गरेको बताइन् ।

“बजेटमा सांसदहरूले नै असहमति जनाउने गरेको मैले पाएको छु । तर, यो विधेयकले केही हदसम्म त्यसलाई संशोधन गरेको देख्छु,” उनले भनिन्, “बजेट प्रणालीको मुख्य कुरा बजेट क्यालेन्डर नै हो जस्तो लाग्छ । बजेट क्यालेन्डर ठिक ठाउँबाट ठिक समयमा आयो भने त्यसले धेरै कुराहरूलाई मेन्टेन गर्छ भन्ने लागेको छ ।”

यो संशोधन वार्षिक बजेटका लागि राम्रो भएको उनले बताइन् । जहिले पनि कर्मचारी तथा निश्चित व्यक्तिले लेखेको भन्ने आरोप लाग्ने गरेको र सांसदले अपनत्व लिन नपाएको अवस्था रहेको पनि उनले बताइन् ।  

कात्तिकबाट बजेट लेखन सुरू गर्नुपर्ने उनको भनाइ छ । राष्ट्रिय गौरवका आयोजनाहरूमा स्रोत सुनिश्चितता गरेर मात्र ठेक्का लगाउने भनिनु राम्रो व्यवस्था हुने उनले बताइन् ।